Ċifri ewlenin

1 Rapport amministrattiv

1.1 Għan tar-rapport amministrattiv tal-BĊE

Ir-rapport amministrattiv huwa parti integrali mill-Kontijiet Annwali tal-BĊE u huwa mfassal biex jipprovdi lill-qarrejja b’informazzjoni kuntestwali relatata mar-rapporti finanzjarji.^[1],,[2] Minħabba li l-attivitajiet u l-operazzjonijiet tal-BĊE jitwettqu b’appoġġ għall-objettivi ta’ politika tiegħu, il-pożizzjoni finanzjarja u r-riżultat tal-BĊE għandhom jitqiesu flimkien mal-azzjonijiet ta’ politika tiegħu.

Għal dan il-għan, ir-rapport amministrattiv jippreżenta l-attivitajiet u l-operazzjonijiet ewlenin tal-BĊE, kif ukoll l-impatt tagħhom fuq ir-rapporti finanzjarji tiegħu. Barra dan, janalizza l-iżviluppi ewlenin fil-karta tal-bilanċ u l-kont tal-profitt u t-telf matul is-sena u jinkludi tagħrif dwar l-ekwità netta tal-BĊE. Finalment, jiddeskrivi l-ambjent ta’ riskju li fih jopera l-BĊE, waqt li jipprovdi tagħrif dwar ir-riskji speċifiċi li l-BĊE hu espost għalihom, u l-politika għall-ġestjoni tar-riskji użata biex ittaffihom.

1.2 Kompiti u attivitajiet ewlenin

Il-BĊE hu parti mill-Eurosistema, li tinkludi, minbarra l-BĊE, il-banek ċentrali nazzjonali (BĊNi) tal-Istati Membri tal-Unjoni Ewropea (UE) li l-munita tagħhom hija l-euro.^[3] Il-BĊE għandu l-għan ewlieni li jżomm l-istabbiltà tal-prezzijiet. Il-BĊE jaqdi l-kompiti tiegħu kif deskritt fit-Trattat dwar il-Funzjonament tal-Unjoni Ewropea^[4] u fl-Istatut tas-Sistema Ewropea tal-Banek Ċentrali u tal-Bank Ċentrali Ewropew (Statut tal-SEBĊ)^[5] (Figura 1). Il-BĊE jwettaq l-attivitajiet tiegħu biex isegwi l-mandat tiegħu u mhux bl-intenzjoni li jiġġenera profitt.

Figura 1

Il-kompiti ewlenin tal-BĊE

L-operazzjonijiet tal-politika monetarja tal-Eurosistema jiġu reġistrati fir-rapporti finanzjarji tal-BĊE u tal-BĊNi, fatt li jirrifletti l-prinċipju tal-implimentazzjoni deċentralizzata tal-politika monetarja fl-Eurosistema. It-Tabella 1 hawn taħt tagħti deskrizzjoni ġenerika tal-operazzjonijiet u tal-funzjonijiet ewlenin tal-BĊE mwettqa biex jissodisfa l-mandat tiegħu, u l-impatt tagħhom fuq ir-rapporti finanzjarji tal-BĊE.

1.3 Żviluppi finanzjarji

1.3.1 Karta tal-bilanċ

Il-karta tal-bilanċ tal-BĊE kibret bejn l-2020 u l-2022, prinċipalment minħabba x-xiri dirett ta’ titoli mill-BĊE fil-kuntest tal-implimentazzjoni tal-politika monetarja tal-Eurosistema (Ċart 1). L-ixprunaturi ewlenin tal-espansjoni sostanzjali fl-2020 u fl-2021 kienu x-xiri nett ta’ titoli taħt il-programm ta’ xiri ta’ assi (APP) u t-tnedija tal-programm ta’ xiri għall-emerġenza pandemika (PEPP) f’Marzu 2020.^[12] Ix-xiri nett ta’ titoli taħt il-PEPP u l-APP twaqqaf sa mill-aħħar ta’ Marzu 2022 u mill-1 ta’ Lulju 2022, rispettivament, u dan wassal għal żieda iżjed moderata fil-karta tal-bilanċ tal-BĊE fl-2022. Fl-2023, il-karta tal-bilanċ tal-BĊE bdiet tonqos, prinċipalment minħabba t-tnaqqis gradwali fl-investimenti taħt l-APP bħala riżultat tal-investiment mill-ġdid parzjali biss tal-pagamenti prinċipali minn titoli li mmaturaw bejn Marzu u Ġunju 2023, u l-waqfien totali ta’ tali investimenti mill-ġdid minn Lulju 2023.

Fl-2021 il-karta tal-bilanċ tal-BĊE naqset ulterjorment, bi EUR 32.6 biljun għal EUR 640.6 biljun, prinċipalment minħabba l-fidi ta’ titoli miżmuma taħt l-APP u l-PEPP. Dan il-fidi rriżulta fi tnaqqis fit-titoli miżmuma għal għanijiet tal-politika monetarja, waqt li l-ħlas bi flus kontanti għal dawn it-tranżazzjonijiet permezz tal-kontijiet ta’ TARGET wassal għal tnaqqis korrispondenti fl-obbligazzjonijiet fi ħdan l-Eurosistema. Dan it-tnaqqis kien parzjalment ikkumpensat miż-żieda fil-valur ekwivalenti f’euro tal-assi ta’ riżerva barranija tal-BĊE.

Ċart 1

Komponenti ewlenin tal-karta tal-bilanċ tal-BĊE

(biljuni ta’ EUR)

Titoli denominati f’euro miżmuma għall-għanijiet tal-politika monetarja rrappreżentaw 59% tal-assi totali tal-BĊE fi tmiem l-2024. Taħt din il-partita tal-karta tal-bilanċ, il-BĊE għandu titoli akkwistati fil-kuntest tal-Programm tas-Swieq tat-Titoli (SMP), it-tielet programm ta’ xiri ta’ bonds kopert (CBPP3), il-programm ta’ xiri ta’ titoli sostnut mill-assi (ABSPP), il-programm tax-xiri tas-settur pubbliku (PSPP) u l-Programm ta’ Xiri ta’ Emerġenza fil-każ ta’ Pandemija (PEPP).

Abbażi tad-deċiżjonijiet rilevanti tal-Kunsill Governattiv, minn Lulju 2023, l-Eurosistema ma għadhiex tinvesti mill-ġdid pagamenti kapitali minn titoli li jimmaturaw taħt l-APP. L-Eurosistema kompliet tinvesti mill-ġdid pagamenti kapitali minn titoli li jimmaturaw taħt il-PEPP b’mod sħiħ matul l-ewwel nofs tal-2024 u parzjalment matul it-tieni nofs tas-sena, u naqset il-portafoll tal-PEPP fil-livell tal-Eurosistema b’medja ta’ EUR 7.5 biljun fix-xahar f’dak il-perjodu. Fi tmiem l-2024, l-investimenti mill-ġdid taħt il-PEPP twaqqfu. Bħala riżultat ta’ dawn id-deċiżjonijiet, il-portafoll ta’ titoli miżmuma mill-BĊE għal skopijiet ta’ politika monetarja naqas b’EUR 48.6 biljun għal EUR 376.8 biljun (Ċart 2). L-APP naqas b’EUR 41.6 biljun għal EUR 220.1 biljun bil-parteċipazzjonijiet tal-PSPP, ABSPP u CBPP3 taħt l-APP jonqsu b’EUR 32.2 biljun, EUR 6.3 biljun u EUR 3.1 biljun rispettivament. Il-portafoll tal-PEPP naqas b’EUR 6.8 biljun għal EUR 156.3 biljun.

Ċart 2

Titoli miżmuma għall-għanijiet tal-politika monetarja

(biljuni ta’ EUR)

It-titoli miżmuma mill-BĊE taħt l-APP u l-PEPP fi tmiem l-2024 kellhom profil ta’ maturità diversifikat (Ċart 3).^[13]

Ċart 3

Profil tal-maturità tal-APP u l-PEPP

Fl-2024, il-valur totali ekwivalenti f’euro tal-assi tal-BĊE f’riżervi barranin, li jikkonsistu minn deheb, drittijiet speċjali ta’ ġbid, dollari Amerikani, yen Ġappuniżi u renminbi Ċiniżi, żdied bi EUR 15.4-il biljun għal EUR 103.1 biljun.

Il-valur ekwivalenti f’euro tal-investimenti tal-BĊE f’deheb żdied b’EUR 10.5 biljun għal EUR 40.9 biljun fl-2024 (Ċart 4), minħabba żieda fil-prezz tas-suq tad-deheb f’termini ta’ euro. Din iż-żieda wasslet ukoll għal żieda ekwivalenti fil-kontijiet ta’ rivalwazzjoni tad-deheb tal-BĊE (ara t-Taqsima 1.3.2 “Ekwità netta”).

Ċart 4

Investimenti f’deheb u prezzijiet tad-deheb

(skala tax-xellug: EUR biljuni; skala tal-lemin: euro għal kull uqija fina ta’ deheb)

L-investiment tal-BĊE f’munita barranija ta’ dollari Amerikani, yen Ġappuniż u renminbi Ċiniż żdiedu f’termini ta’ euro b’EUR 4.7 biljun għal EUR 60.0 biljun (Ċart 5), prinċipalment minħabba l-apprezzament tad-dollaru Amerikan meta mqabbel mal-euro u l-investiment mill-ġdid tal-introjtu miksub matul is-sena, primarjament fuq il-portafoll tad-dollaru Amerikan.^[14] Dan l-apprezzament tad-dollaru Amerikan meta mqabbel mal-euro ġie rifless ukoll f’bilanċi ogħla fil-kontijiet ta’ rivalwazzjoni tal-BĊE (ara t-Taqsima 1.3.2 “Ekwità netta”).

Ċart 5

Investimenti f’muniti barranin

(biljuni ta’ EUR)

Id-dollaru Amerikan baqa’ l-komponent ewlieni fl-investimenti tal-BĊE f’muniti barranin, u rrappreżenta madwar 83 % tat-total fi tmiem l-2024.

Il-BĊE jamministra l-investimenti tiegħu f’muniti barranin bl-użu ta’ approċċ bi tliet stadji. L-ewwel, portafoll referenzjali strateġiku jitfassal mill-maniġers tar-riskju tal-BĊE u jiġi approvat mill-Kunsill Governattiv. It-tieni, il-maniġers tal-portafolli tal-BĊE jfasslu l-portafoll referenzjali tattiku, li jiġi approvat mill-Bord Eżekuttiv. It-tielet, isiru operazzjonijiet ta’ investiment ta’ kuljum b’mod deċentralizzat mill-BĊNi fuq bażi ta’ kuljum.

L-investimenti tal-BĊE f’muniti barranin jiġu investiti l-aktar f’titoli u f’depożiti tas-suq monetarju jew jinżammu f’kontijiet kurrenti (Ċart 6). It-titoli f’dan il-portafoll jiġu valwati bil-prezzijiet tas-suq tal-aħħar tas-sena.

Ċart 6

Kompożizzjoni tal-investimenti f’muniti barranin

(biljuni ta’ EUR)

L-għan tal-investimenti f’muniti barranin tal-BĊE hu li jiffinanzjaw interventi potenzjali fis-suq tal-kambju barrani. Għal din ir-raġuni, l-investimenti tal-BĊE f’muniti barranin huma ġestiti skont tliet għanijiet (f’ordni ta’ prijorità): likwidità, sikurezza u redditu. Għalhekk, dan il-portafoll jinkludi l-aktar titoli b’maturitajiet qosra (Ċart 7).

Ċart 7

Profil tal-maturità tat-titoli denominati f’muniti barranin

Il-valur tal-portafoll tal-fondi proprji żdied b’EUR 0.6 biljun għal EUR 22.7 biljun (Ċart 8), primarjament minħabba l-investiment mill-ġdid tal-introjtu mill-imgħax iġġenerat fuq dan il-portafoll.

Il-portafoll jikkonsisti prinċipalment minn titoli denominati f’euro valwati bil-prezzijiet tas-suq ta’ tmiem is-sena. Fl-2024 it-titoli tad-dejn tal-gvern ammontaw għal 78% tal-portafoll totali.

Is-sehem tal-investimenti ekoloġiċi fil-portafoll tal-fondi proprji baqa’ jiżdied u minn 20 % fi tmiem l-2023 żdied għal 28 % fi tmiem l-2024. Il-BĊE qed jippjana li jkompli jżid dan is-sehem fis-snin li ġejjin.^[15] Fl-2021 u fl-2022, ix-xiri ta’ bonds ekoloġiċi fi swieq sekondarji kien ikkumplimentat minn investimenti fil-fond ta’ investiment f’bonds ekoloġiċi denominati f’euro għall-banek ċentrali mniedi mill-Bank għall-Ħlasijiet Internazzjonali f’Jannar 2021. F’Ottubru 2024, il-BĊE beda jinvesti sehem żgħir mill-fondi proprji tiegħu f’fondi nnegozjati fil-borża (ETFs) li jsegwu parametri referenzjarji allinjati mal-Ftehim ta’ Pariġi.^[16] Din id-diversifikazzjoni ssaħħaħ il-potenzjal ta’ redditu tal-portafoll tal-fondi proprji tal-BĊE u tkompli tallinja l-investimenti tiegħu ma’ perkors ta’ dekarbonizzazzjoni konsistenti mal-għanijiet tal-Ftehim ta’ Pariġi u l-Liġi Ewropea dwar il-Klima.^[17]

Ċart 8

Il-portafoll tal-fondi proprji tal-BĊE

(biljuni ta’ EUR)

Il-portafoll tal-fondi proprji tal-BĊE fil-biċċa l-kbira jikkonsisti f’investimenti tal-kapital imħallas tiegħu u ammonti mwarrba fil-fond ġenerali tar-riżervi u fil-provvediment kontra riskji finanzjarji. L-għan ta’ dan il-portafoll hu li jipprovdi introjtu biex jgħin fil-finanzjament tal-ispejjeż operattivi tal-BĊE li mhumiex relatati mat-twettiq tal-kompiti superviżorji tiegħu.^[18] Huwa investit f’assi denominati f’euro, soġġett għal-limiti imposti mill-qafas tal-kontroll tar-riskju tiegħu. Dan jirriżulta fi struttura ta’ maturità iżjed diversifikata (Ċart 9), meta mqabbla mal-portafoll tar-riżervi narranin.

Ċart 9

Profil tal-maturità tat-titoli tal-fondi proprji tal-BĊE

Fl-aħħar tal-2024, il-valur totali tal-karti tal-flus euro fiċ-ċirkolazzjoni maħruġin mill-Eurosistema kien ta’ EUR 1,588.3 biljun, żieda ta’ 1.3% meta mqabbel mal-aħħar tal-2023. Il-BĊE ġie allokat sehem ta’ 8% mit-total tal-valur tal-karti tal-flus tal-euro fiċ-ċirkolazzjoni, li ammonta għal EUR 127.1 biljun fl-aħħar tas-sena. Legalment, kemm il-BĊE kif ukoll il-banek ċentrali nazzjonali (BĊNi) tal-pajjiżi taż-żona tal-euro għandhom id-dritt joħorġu l-karti tal-flus tal-euro. Fil-prattika, madankollu, il-BĊNi biss joħorġu fiżikament karti tal-flus tal-euro jew jirtirawhom miċ-ċirkolazzjoni. Għalhekk, il-BĊE jżomm pretensjonijiet intra-Eurosistema fil-konfront tal-BĊNi taż-żona tal-euro ekwivalenti għall-valur tal-karti tal-flus fiċ-ċirkolazzjoni allokati lilu.

L-obbligazzjonijiet fi ħdan l-Eurosistema tal-BĊE, li prinċipalment jikkonsistu fil-bilanċ nett ta’ TARGET tal-BĊNi taż-żona tal-euro meta mqabbel ma’ tal-BĊE u l-obbligazzjonijiet tal-BĊE fir-rigward tal-assi tar-riżervi barranin ittrasferiti lilu mill-BĊNi taż-żona tal-euro meta ngħaqdu mal-Eurosistema, naqsu b’EUR 56.4 biljun għal EUR 388.7 biljun fl-2024.

L-iżvilupp tal-obbligazzjonijiet intra-Eurosistema huwa ddeterminat mill-evoluzzjoni tal-obbligazzjoni netta ta’ TARGET. Il-fatturi ewlenin li kkontribwew għall-bidliet fl-obbligazzjoni netta ta’ TARGET tul il-perjodu 2020–24 kienu x-xiri u l-fidi ta’ titoli tal-politika monetarja, li jiġu saldati permezz ta’ kontijiet ta’ TARGET, u bidliet fl-obbligazzjonijiet lejn residenti taż-żona tal-euro u persuni mhux residenti fiż-żona tal-euro denominati f’euro (Ċart 10). Fl-2024, l-obbligazzjoni netta ta’ TARGET tal-BĊE naqset b’EUR 56.3 biljun, prinċipalment minħabba l-influssi ta’ flus kontanti minn fidi ta’ titoli tal-politika monetarja u ż-żieda fl-obbligazzjonijiet lejn residenti mhux fiż-żona tal-euro denominati f’euro.

Ċart 10

Bilanċ nett intra-Eurosistema ta’ TARGET, obbligazzjonijiet lejn residenti taż-żona tal-euro u persuni mhux residenti fiż-żona tal-euro denominati f’euro u titoli miżmumin għall-għanijiet tal-politika monetarja

(biljuni ta’ EUR)

Fl-2024, l-obbligazzjonijiet l-oħrajn tal-BĊE żdiedu b’EUR 16.6-il biljun għal EUR 74.9 biljun, prinċipalment minħabba żieda fl-obbligazzjonijiet lejn residenti mhux fiż-żona tal-euro denominati f’euro bħala riżultat ta’ depożiti ogħla aċċettati mill-BĊE fir-rwol tiegħu bħala aġent fiskali.^[19]

1.3.2 Ekwità netta

L-ekwità netta tal-BĊE tikkonsisti fil-kapital imħallas tiegħu, kull ammont miżmum fil-provvediment għar-riskji finanzjarji u l-fond ta’ riżerva ġenerali, il-kontijiet ta’ rivalwazzjoni, kwalunkwe telf akkumulat mis-snin ta’ qabel u kwalunkwe gwadann/telf għas-sena.^[20],,[21]

Fi tmiem l-2024, l-ekwità netta tal-BĊE ammontat għal EUR 50.0 biljun (Ċart 11 u Ċart 2). Dan kien EUR 5.4 biljun ogħla milli fi tmiem l-2023 minħabba ż-żieda fil-kontijiet ta’ rivalwazzjoni, prinċipalment bħala riżultat taż-żieda fil-prezz tas-suq tad-deheb f’termini ta’ euro fl-2024 u l-apprezzament tad-dollaru Amerikan meta mqabbel mal-euro. Iż-żieda li rriżultat fl-ekwità netta tal-BĊE ġiet parzjalment ikkumpensata minn (i) it-telf imġarrab fl-2024; u (ii) it-tnaqqis fil-kapital imħallas wara l-aġġustament ta’ kull ħames snin tal-iskema tal-kapital tal-BĊE li daħal fis-seħħ fl-1 ta’ Jannar 2024 u rriżulta fi tnaqqis fil-ponderazzjoni tal-BĊNi taż-żona tal-euro (li ħallsu s-sottoskrizzjonijiet kompletament).

Ċart 11

L-ekwità netta tal-BĊE

(biljuni ta’ EUR)

Gwadanni mhux realizzati fuq deheb, muniti barranin u titoli u strumenti oħra li huma soġġetti għar-rivalwazzjoni tal-prezzijiet mhumiex rikonoxxuti bħala introjtu fil-kont tal-profitt u t-telf iżda huma rreġistrati direttament fil-kontijiet ta’ rivalwazzjoni li jidhru fuq in-naħa tal-obbligazzjonijiet tal-karta tal-bilanċ tal-BĊE. Il-bilanċi f’dawn il-kontijiet jistgħu jintużaw biex jassorbu l-impatt ta’ ċaqliq sfavorevoli fil-prezzijiet u/jew fir-rati tal-kambju rispettivi fil-ġejjieni, u b’hekk isaħħu r-reżiljenza tal-BĊE kontra r-riskji sottostanti. Fl-2024, il-kontijiet ta’ rivalwazzjoni għad-deheb, muniti barranin u għal titoli u strumenti oħra żdiedu b’EUR 13.4-il biljun għal EUR 50.2 biljun, prinċipalment minħabba bilanċi ta’ rivalwazzjoni ogħla għad-deheb bħala riżultat taż-żieda fil-prezz tas-suq tad-deheb f’termini ta’ euro. Barra minn hekk, il-bilanċi ta’ rivalwazzjoni għall-muniti barranin żdiedu, prinċipalment minħabba l-apprezzament tad-dollaru Amerikan meta mqabbel mal-euro, li aktar milli jpaċi t-tnaqqis tal-bilanċi ta’ rivalwazzjoni għall-yen Ġappuniż li jirriżulta mid-deprezzament tiegħu meta mqabbel mal-euro (Ċart 12).

Ċart 12

Ir-rati ewlenin tal-kambju barrani u l-prezz tad-deheb matul il-perjodu 2020-24

(bidliet perċentwali meta mqabbla mal-2020; data ta’ tmiem is-sena)

Minħabba l-espożizzjoni tiegħu għar-riskji finanzjarji (ara t-Taqsima 1.4.1 “Riskji finanzjarji”), il-BĊE jista’ jwarrab provvediment għar-riskji finanzjarji, li għandu jintuża sal-punt meqjus meħtieġ mill-Kunsill Governattiv biex ipaċi t-telf li jirriżulta bħala riżultat ta’ din l-iskopertura. Fil-31 ta’ Diċembru 2024, dan il-provvediment kien żero minħabba li ntuża kompletament fl-2023 biex ikopri parti mit-telf ta’ dik is-sena. Fil-kuntest tar-rieżami annwali tad-daqs ta’ dan il-provvediment, il-Kunsill Governattiv jista’ jiddeċiedi li jirrifornih ladarba l-BĊE jkun irritorna biex jagħmel profitt u jpaċi t-telf akkumulat riportat mis-snin preċedenti.

It-telf tal-BĊE għas-sena kien ta’ EUR 7.9 biljun (ara t-Taqsima 1.3.3 “Kont tal-profitt u t-telf”). Bħal fis-sena ta’ qabel, il-Kunsill Governattiv iddeċieda li jirriporta ’l quddiem dan it-telf fuq il-karta tal-bilanċ tal-BĊE biex jiġi paċut kontra profitti futuri.

1.3.3 Kont tal-profitt u telf

Ir-riżultat tal-BĊE naqas sena wara sena sa mill-2020 (Ċart 13). Fl-2021, it-tnaqqis kien xprunat l-aktar minn intorjtu aktar baxx iġġenerat fuq riżervi barranin u fuq titoli miżmuma għall-finijiet tal-politika monetarja. Fl-2022 u fl-2023, it-tnaqqis fir-riżultat tal-BĊE kien primarjament il-konsegwenza tal-materjalizzazzjoni tar-riskju tar-rata tal-imgħax peress li ż-żieda fir-rati tal-imgħax fiż-żona tal-euro wasslet għal żieda immedjata fl-ispiża tal-imgħax imħallsa mill-BĊE fuq l-obbligazzjoni netta tiegħu ta’ TARGET, li ġiet remunerata bir-rata tal-operazzjonijiet ewlenin ta’ rifinanzjament (rata MRO).^[22] Fl-istess ħin, l-introjtu miksub mill-assi tal-BĊE ma żdiedx bl-istess mod jew bl-istess pass (ara t-Taqsima 1.4.1 “Riskji finanzjarji”). Din is-sitwazzjoni kompliet fl-2024 peress li, minkejja t-tnaqqis fir-rata tal-politika li beda f’Ġunju ta’ dik is-sena, l-ispiża tal-imgħax imħallsa fuq l-obbligazzjoni netta ta’ TARGET kienet bħala medja xorta ogħla mill-introjtu mill-imgħax miksub fuq l-assi.

It-telf tal-BĊE għall-2023 u għall-2024, li ġie wara perjodu twil ta’ profitti sostanzjali, jirrifletti r-rwol u l-azzjonijiet ta’ politika meħtieġa tal-Eurosistema fit-twettiq tal-mandat primarju tagħha li żżomm l-istabbiltà tal-prezzijiet u ma għandu l-ebda impatt fuq il-kapaċità tagħha li tmexxi politika monetarja effettiva. Sal-2022, il-karta tal-bilanċ tal-BĊE kibret b’mod sinifikanti xprunata prinċipalment mix-xiri ta’ titoli taħt il-programmi ta’ xiri dirett. Fuq in-naħa tal-assi, il-maġġoranza tat-titoli tal-politika monetarja miżmuma bħalissa għandhom maturitajiet twal u kupuni fissi u nxtraw matul perjodu meta r-rati tal-imgħax kienu baxxi ħafna jew żero. Dawn l-assi se jkomplu jiġġeneraw introjtu relattivament baxx mill-imgħax, u mhumiex affettwati immedjatament mill-bidliet fir-rati tal-imgħax ewlenin tal-BĊE. Fl-istess ħin, is-saldu fi flus kontanti ta’ dan ix-xiri permezz ta’ TARGET wassal għal żieda fl-obbligazzjoni netta tal-BĊE fir-rigward ta’ TARGET, li hija sensittiva ħafna għal bidliet fir-rati tal-imgħax ewlenin tal-BĊE.

Qabel ma jerġa’ jagħmel profitti, il-BĊE xorta jista’ jġarrab telf fis-snin li ġejjin bħala riżultat tal-materjalizzazzjoni tar-riskju taċ-ċaqliq fir-rata tal-imgħax. Għalkemm l-okkorrenza u d-daqs ta’ dan it-telf huma inċerti u jiddependu ħafna mill-evoluzzjoni futura tar-rati tal-imgħax ewlenin tal-BĊE u fuq id-daqs u l-kompożizzjoni tal-karta tal-bilanċ tal-BĊE, jekk jimmaterjalizzawx, huma mistennija li jkunu inqas minn dawk imġarrba fl-2023 u fl-2024. Barra minn hekk, il-kapital tal-BĊE u l-kontijiet ta’ rivalwazzjoni sostanzjali tiegħu, li flimkien ammontaw għal EUR 59.2 biljun fi tmiem l-2024 (ara t-Taqsima 1.3.2 “Ekwità netta”), jirfdu s-saħħa finanzjarja tiegħu, u, fi kwalunkwe każ, il-BĊE jista’ jopera b’mod effettiv u jissodisfa l-mandat primarju tiegħu li jżomm l-istabbiltà tal-prezzijiet irrispettivament minn kwalunkwe telf.

Ċart 13

Komponenti ewlenin tal-kont tal-profitt u t-telf tal-BĊE

(miljuni ta’ EUR)

Fl-2024, it-telf tal-BĊE għas-sena ammonta għal EUR 7,944 miljun, li huwa komparabbli mat-telf ta’ EUR 7,886 miljun qabel it-trasferiment mill-provvedimenti kontra r-riskji fl-2023. F’dik is-sena, il-provvediment kontra r-riskji finanzjarji ġie diżimpennjat kompletament biex ikopri parzjalment it-telf imġarrab, u b’hekk it-telf għall-2023 tela’ għal EUR 1,266 miljun, filwaqt li fl-2024 il-provvediment kien żero. L-ixprunatur ewlieni tat-telf kompliet tkun l-ispiża tal-imgħax nett sinifikanti (Ċart 14).

Ċart 14

Xprunaturi tal-profitt (telf) tal-BĊE għall-2023 u l-2024

(miljuni ta’ EUR)

L-ispiża netta tal-imgħax tal-BĊE ammontat għal EUR 6,983 miljun fl-2024, meta mqabbla ma’ EUR 7,193 miljun fl-2023 (Ċart 15). Il-komponent ewlieni kien l-ispiża tal-imgħax sinifikanti li tirriżulta mill-obbligazzjoni netta ta’ TARGET tal-BĊE, li aktar milli tpaċi l-introjtu mill-imgħax li jirriżulta minn (i) il-pretensjonijiet tal-BĊE relatati mal-allokazzjoni tal-karti tal-flus tal-euro fi ħdan l-Eurosistema, (ii) titoli tal-politika monetarja u (iii) riżervi barranin.

Ċart 15

Introjtu nett mill-imgħax/(spiża)

(miljuni ta’ EUR)

L-introjtu nett mill-imgħax iġġenerat fuq titoli miżmuma għall-għanijiet tal-politika monetarja żdied bi EUR 383 miljun għal EUR 3,850 miljun fl-2024 (Ċart 16), l-aktar minħabba l-introjtu nett ogħla mill-investimenti taħt il-PEPP, li ogħla b’EUR 606 miljun għal EUR 1,206 miljun. Din iż-żieda kienet prinċipalment attribwibbli għall-amortizzament tal-primjum aktar baxx tat-titoli tas-settur pubbliku. L-introjtu mill-imgħax nett minn titoli miżmuma taħt l-APP (CBPP3, ABSPP u PSPP) naqas b’EUR 199 miljun għal EUR 2,619-il miljun. Dan it-tnaqqis kien prinċipalment dovut għat-tnaqqis fl-introjtu mill-imgħax mill-parteċipazzjonijiet taħt l-ABSPP, li naqas b’EUR 223 miljun għal EUR 419-il miljun bħala riżultat tal-parteċipazzjonijiet ferm aktar baxxi minħabba r-ripagamenti tat-titoli. L-introjtu mill-imgħax fuq titoli miżmuma taħt il-PSPP ammonta għal EUR 2,022 miljun fl-2024, li kien kważi l-istess bħal fl-2023 peress li t-titoli miżmuma taħt dan il-portafoll kienu fil-biċċa l-kbira akkwistati b’redditi baxxi u għalhekk il-maturazzjoni tagħhom kellha biss impatt żgħir fuq l-introjtu mill-imgħax. L-introjtu nett mill-imgħax fuq l-SMP naqas b’EUR 49 miljun għal EUR 24 miljun, minħabba t-tnaqqis fid-daqs tal-portafoll bħala riżultat tat-titoli li mmaturaw.

Ċart 16

Introjtu nett mill-imgħax/(spiża) fuq titoli miżmuma għall-għanijiet tal-politika monetarja

(miljuni ta’ EUR)

L-introjtu mill-imgħax nett fuq riżervi barranin żdied b’EUR 155 miljun għal EUR 2,537 miljun, l-aktar minħabba introjtu ogħla mill-imgħax fuq titoli denominati f’dollari Amerikani.

L-introjtu mill-imgħax li jirriżulta mill-allokazzjoni ta’ karti tal-flus tal-euro lill-BĊE u l- ispiża tal-imgħax li tirriżulta mir-remunerazzjoni tal-pretensjonijiet tal-BĊNi fir-rigward ta’ riżervi barranin ittrasferiti ammontaw għal EUR 415 miljun u EUR 5,232 miljun, u b’EUR 114 miljun sa EUR 1,448 miljun rispettivament fl-2024. Dawn iż-żidiet kienu dovuti għar-rata medja ogħla tal-MRO ta’ 4.1 % fl-2024 (2023: 3.8 %), peress li r-rata tal-MRO ntużat għar-remunerazzjoni ta’ dawn il-bilanċi. Il-Kunsill Governattiv beda jnaqqas ir-rati tal-imgħax ewlenin tal-BĊE f’Ġunju 2024, u naqqas ir-rata tal-MRO għal 3.15 % sa tmiem l-2024, meta mqabbel ma’ 4.5 % fil-bidu tas-sena.

L-ispiża netta tal-imgħax li tirriżulta mill-bilanċi ta’ TARGET dovuti minn/lill-BĊNi żdiedet b’EUR 1,439 miljun għal EUR 15,674 miljun fl-2024. Din iż-żieda kienet xprunata prinċipalment mir-rata medja ogħla tal-MRO fl-2024, minħabba li din ir-rata ntużat ukoll għar-remunerazzjoni tal-bilanċi ta’ TARGET intra-Eurosistema tal-BĊE.

L-ispiża netta l-oħra tal-imgħax naqset b’EUR 809 miljun għal EUR 1,479 miljun fl-2024. Dan kien prinċipalment dovut għall-ispiża tal-imgħax aktar baxxa fuq depożiti aċċettati mill-BĊE fir-rwol tiegħu bħala aġent fiskali u fuq flus kontanti riċevuti bħala kollateral fi tranżazzjonijiet ta’ self ta’ titoli, minħabba l-bilanċ medju aktar baxx ta’ dawn iż-żewġ entrati fl-2024, u l-introjtu mill-imgħax ogħla fuq il-portafoll tal-fondi proprji bħala riżultat tar-redditi li ilhom jiżdiedu fiż-żona tal-euro mill-2022 (Ċart 17). Dawn il-bidliet ġew parzjalment ikkumpensati mill-ispiża tal-imgħax ogħla fuq il-bilanċi tas-sistemi anċillari taż-żona tal-euro bħala riżultat ta’ żieda ulterjuri fil-bilanċ medju u rata ta’ remunerazzjoni medja ogħla fl-2024.

Ċart 17

Rendimenti tal-bonds tal-gvern ta’ seba’ snin fiż-żona tal-euro

(perċentwali fis-sena; data fl-aħħar tax-xahar)

It-telf nett realizzat li jirriżulta minn operazzjonijiet finanzjarji żdied b’EUR 89 miljun għal EUR 17 miljun fl-2024 (Ċart 18). Dan it-telf irriżulta prinċipalment minn primjums pendenti fuq titoli miżmuma fl-ABSPP li tħallsu lura qabel il-maturità. It-telf realizzat fil-prezz kien parzjalment ikkumpensat minn gwadanni realizzati fir-rata tal-kambju, li fil-biċċa l-kbira rriżultaw bħala konsegwenza tat-tnaqqis fil-prezz tal-aħħar tas-sena ta’ għadd ta’ titoli denominati f’dollaru Amerikan.

Il-gwadanni u t-telf tal-prezzijiet realizzati fuq tranżazzjonijiet finanzjarji f’munita barranija, b’mod partikolari fuq il-bejgħ ta’ titoli ddenominati f’dollaru Amerikan u fuq futuri tar-rati tal-imgħax, kienu xprunati minn varjazzjonijiet fir-redditi tal-bonds f’dollaru Amerikan u fil-biċċa l-kbira paċew lil xulxin matul l-2024 (Ċarts 19 u 20).

Ċart 18

Gwadanni/(telf) realizzat(i) li jirriżulta minn operazzjonijiet finanzjarji

(miljuni ta’ EUR)

Ċart 19

Gwadanni/(telf) realizzat kull trimestru minn operazzjonijiet finanzjarji fl-2023 u fl-2024

(miljuni ta’ EUR)

Ċart 20

Redditi tal-bonds tal-gvern fl-Istati Uniti, fil-Ġappun u fiċ-Ċina

(perċentwali fis-sena; data fl-aħħar tax-xahar)

It-telf mir-rivalwazzjoni mhux realizzat jitniżżel bħala spiża fil-forma ta’ tnaqqis fil-valur fi tmiem is-sena fil-kont tal-profitt u t-telf tal-BĊE. Fl-2024, dan it-tnaqqis ammonta għal EUR 269 miljun (Ċart 21). Telf mhux realizzat fil-prezz li jammonta għal EUR 187 miljun irriżulta prinċipalment minn tnaqqis fil-valur tas-suq ta’ għadd ta’ titoli miżmuma fil-portafoll tad-dollaru Amerikan. Kien hemm ukoll telf mhux realizzat fir-rata tal-kambju ta’ EUR 81 miljun fuq il-parteċipazzjoni tal-BĊE ta’ yen Ġappuniż fl-2024 bħala riżultat tad-deprezzament ta’ din il-munita meta mqabbla mal-euro għal rata tal-kambju taħt il-kost tal-akkwist tal-parteċipazzjoni.

Ċart 21

Tnaqqis tal-valur ta’ assi u pożizzjonijiet finanzjarji

(miljuni ta’ EUR)

L-ispejjeż operazzjonali totali tal-BĊE, inkluż id-deprezzament u s-servizzi tal-produzzjoni tal-karti tal-flus, żdiedu b’EUR 198 miljun għal EUR 1,470 miljun (Ċart 22). Dan kien dovut l-aktar għal kostijiet ogħla tal-persunal, li jirriflettu kostijiet ogħla għall-benefiċċji ta’ wara l-impjieg li rriżultaw minn emenda għar-regoli li jirregolaw il-pjanijiet tal-pensjoni tal-BĊE fl-2024. L-ispejjeż amministrattivi żdiedu wkoll, prinċipalment minħabba nfiq ogħla fuq l-IT fir-rigward tat-trasformazzjoni diġitali, filwaqt li jirriflettu wkoll l-impatt tal-inflazzjoni.

L-ispejjeż relatati mas-superviżjoni bankarja huma koperti għalkollox permezz ta’ tariffi imposti fuq l-entitajiet taħt superviżjoni. Abbażi tal-ispejjeż attwali mġarrba mill-BĊE fit-twettiq tal-kompiti ta’ superviżjoni bankarji tiegħu, l-introjtu mit-tariffi superviżorji għall-2024 kien ta’ EUR 681 miljun.^[23]

Ċart 22

Spejjeż operattivi u introjtu mit-tariffi superviżorji

(miljuni ta’ EUR)

1.4 Ġestjoni tar-riskji

Il-ġestjoni tar-riskju hi parti kritika tal-attivitajiet tal-BĊE u titwettaq permezz ta’ proċess kontinwu ta’ (i) identifikazzjoni u valutazzjoni tar-riskji, (ii) analiżi tal-istrateġija u l-politika tar-riskju, (iii) l-implimentazzjoni ta’ azzjonijiet li jtaffu r-riskji, u (iv) sorveljanza u rappurtar tar-riskji - li lkoll huma sostnuti b’metodoloġiji, proċessi u sistemi effettivi.

Figura 2

Ċiklu tal-ġestjoni tar-riskju

It-taqsimiet li ġejjin jiffokaw fuq ir-riskji, is-sorsi tagħhom u l-oqfsa applikabbli tal-kontroll tar-riskju.

1.4.1 Riskji finanzjarji

Il-Bord Eżekuttiv jipproponi politika u proċeduri li jiżguraw livell xieraq ta’ protezzjoni kontra r-riskji finanzjarji li l-BĊE hu espost għalihom. Il-Kumitat għall-Ġestjoni tar-Riskju (RMC), li jinkludi esperti mill-banek ċentrali tal-Eurosistema, jikkontribwixxi għas-sorveljanza, il-kejl u r-rappurtar tar-riskji finanzjarji relatati mal-karta tal-bilanċ tal-Eurosistema u jiddefinixxi u jeżamina mill-ġdid il-metodoloġiji u l-oqfsa assoċjati. B’dan il-mod, l-RMC jgħin lill-korpi tat-teħid tad-deċiżjonijiet biex jiżguraw livell xieraq ta’ protezzjoni għall-Eurosistema.

Ir-riskji finanzjarji jirriżultaw mill-attivitajiet ewlenin tal-BĊE u mill-iskoperturi assoċjati. L-oqfsa u l-limiti tal-kontroll tar-riskju li juża l-BĊE biex jamministra l-profil tar-riskju tiegħu f’kull tip ta’ operazzjoni, jirriflettu l-għanijiet tal-politika jew tal-investiment tad-diversi portafolli kif ukoll il-karatteristiċi tar-riskju tal-assi sottostanti.

Biex jissorvelja u jivvaluta r-riskji, il-BĊE juża għadd ta’ metodi tekniċi ta’ stima tar-riskju żviluppati mill-esperti tiegħu. Dawn il-metodi tekniċi huma bbażati fuq qafas konġunt ta’ simulazzjoni tar-riskji tas-suq u tal-kreditu. Il-kunċetti, it-teknika u l-konġetturi tal-mudelli ewlenin li jiffurmaw il-bażi tal-miżuri tar-riskju jużaw l-istandards tal-industrija u d-data tas-suq disponibbli. Ir-riskji huma tipikament kwantifikati bħala n-nuqqas mistenni (ES, expected shortfall), stmat fil-livell ta’ fiduċja ta’ 99% fuq perjodu ta’ sena.^[24] Jintużaw żewġ metodi għall-kalkolu tar-riskji: (i) il-metodu tal-kontabilità, fejn il-kontijiet ta’ rivalwazzjoni tal-BĊE jitqiesu bħala riżerva fil-kalkolu tal-istimi tar-riskju skont ir-regoli applikabbli kollha tal-kontabilità; u (ii) il-metodu finanzjarju, fejn il-kontijiet ta’ rivalwazzjoni ma jitqisux bħala riżerva fil-kalkolu tar-riskju. Il-BĊE jikkalkula wkoll miżuri oħra tar-riskju f’livelli differenti ta’ fiduċja, jagħmel analiżijiet tas-sensittività u tax-xenarji ta’ stress u jivvaluta tbassir aktar fit-tul tal-iskoperturi u l-introjtu biex tinżamm stampa komprensiva tar-riskji.^[25]

Ir-riskji totali tal-BĊE naqsu matul is-sena. Fl-aħħar tal-2024, ir-riskji finanzjarji totali tal-karta tal-bilanċ tal-BĊE, kif imkejlin bl-ES f’livell ta’ fiduċja ta’ 99% fuq perjodu ta’ sena taħt il-metodu tal-kontabilità, kienu ta’ EUR 15.3-il biljun, dan ifisser EUR 1.5 biljun aktar baxx mir-riskji stmati fi tmiem l-2023 (Ċart 23). It-tnaqqis fir-riskju huwa prinċipalment attribwit għat-tnaqqis tal-parteċipazzjonijiet tal-BĊE ta’ titoli tas-settur pubbliku skont l-APP u l-PEPP, peress li l-BĊE ma baqax jinvesti mill-ġdid il-pagamenti prinċipali minn titoli li jimmaturaw mixtrija skont l-APP u, minn Lulju 2024, investa mill-ġdid parzjalment biss dawk minn titoli li jimmaturaw mixtrija taħt il-PEPP. It-tnaqqis tal-parteċipazzjonijiet f’titoli skont l-APP u l-PEPP kien akkumpanjat minn tnaqqis korrispondenti fl-obbligazzjonijiet tal-BĊE, li kompla jikkontribwixxi għat-tnaqqis fir-riskji hekk kif id-diskrepanza fis-sensittività tar-rata tal-imgħax tal-karta bilanċjali bdiet tonqos.

Ċart 23

Riskji finanzarji totali (ES 99% approċċ tal-kontabilità)

(biljuni ta’ EUR)

Ir-riskju għall-kreditu jiġi mill-portafolli tal-politika monetarja tal-BĊE, mill-portafoll tal-fondi proprji tiegħu u mill-investimenti tar-riżervi barranin tiegħu. Waqt li t-titoli ta’ dejn miżmuma għall-għanijiet tal-politika monetarja huma valwati b’kost amortizzat soġġett għal indeboliment u għalhekk, fin-nuqqas ta’ bejgħ, mhumiex soġġetti għal bidliet fil-prezzijiet assoċjati ma’ migrazzjonijiet tal-kreditu, xorta waħda huma soġġetti għal riskju ta’ inadempjenza tal-kreditu. Il-fondi proprji denominati f’euro u r-riżervi barranin jiġu valwati bil-prezz tas-suq u, bħala tali, huma soġġetti għar-riskju tal-migrazzjoni tal-kreditu u r-riskju tal-inadempjenza tal-kreditu. Ir-riskju ta’ kreditu naqas meta mqabbel mal-2023 bħala riżultat tat-tnaqqis fit-titoli miżmuma għall-finijiet tal-politika monetarja.

Ir-riskju tal-kreditu jittaffa l-iżjed permezz tal-applikazzjoni tal-kriterji tal-eliġibbiltà, tal-proċeduri tad-diliġenza dovuta u l-limiti li jvarjaw fil-portafolli kollha.

Ir-riskji tal-kambju u tal-materja prima jiġu mill-investimenti tal-BĊE f’muniti barranin u f’deheb. Ir-riskji tal-munita u tal-komoditajiet żdiedu meta mqabbla mal-2023.

Minħabba r-rwol ta’ dawn l-assi fil-politika, il-BĊE ma jagħmilx hedging tar-riskji relatati mal-valuta u l-komoditajiet. Minflok, dawn ir-riskji jittaffew permezz tal-kontijiet ta’ rivalwazzjoni eżistenti u d-diversifikazzjoni tal-investimenti fil-muniti differenti u d-deheb.

Ir-riżervi barranin tal-BĊE u l-fondi proprji denominati f’euro jiġu investiti l-iżjed f’titoli b’introjtu fiss u huma soġġetti għar-riskju tar-rata tal-imgħax valutat skont is-suq, billi jiġu valwati bil-prezzijiet tas-suq. L-investimenti tar-riżervi barranin tal-BĊE huma investiti l-iżjed f’assi b’maturità relattivament qasira (ara ċ-Ċart 7 fis-Taqsima 1.3.1 “Karta tal-bilanċ”), filwaqt li l-assi fil-portafoll tal-fondi proprji ġeneralment ikollhom maturitajiet itwal (ara ċ-Ċart 9 fit-Taqsima 1.3.1 “Karta tal-bilanċ”). Ir-riskju tar-rata tal-imgħax ta’ dawn il-portafolli, kif imkejjel skont l-approċċ tal-kontabilità, żdied meta mqabbel mal-2023, u dan jirrifletti żviluppi fil-kundizzjonijiet tas-suq.

Ir-riskju tar-rata tal-imgħax valutat skont is-suq jittaffa permezz tal-politika tal-allokazzjoni tal-assi u l-kontijiet ta’ rivalwazzjoni.

Il-BĊE hu soġġett ukoll għar-riskju tar-rata tal-imgħax li jirriżulta mid-diskrepanza bejn ir-rata tal-imgħax li jdaħħal fuq l-assi tiegħu u r-rata tal-imgħax li jħallas fuq l-obbligazzjonijiet tiegħu, u dan għandu impatt fuq l-introjtu nett tiegħu mill-imgħax. Dan ir-riskju mhuwiex marbut direttament ma’ xi portafoll partikolari, iżda pjuttost mal-istruttura tal-karta tal-bilanċ tal-BĊE kollha kemm hi, u b’mod partikolari, l-eżistenza ta’ diskrepanzi fil-maturità u r-redditu bejn l-assi u l-obbligazzjonijiet. Ir-riskju tar-rata tal-imgħax naqas fl-2024, u dan jirrifletti t-tnaqqis fl-obbligazzjonijiet tal-BĊE wara t-tnaqqis tal-parteċipazzjonijiet f’titoli skont l-APP u l-PEPP. Minbarra li jitkejjel fi ħdan l-ES bil-livell ta’ fiduċja ta’ 99% fuq orizzont ta’ sena, dan ir-riskju huwa mmonitorjat permezz ta’ projezzjonijiet tal-profittabbiltà tal-BĊE fuq orizzont medju sa twil.

Dan it-tip ta’ riskju jiġi amministrat permezz tal-politika tal-allokazzjoni ta’ assi u jittaffa ulterjorment bl-eżistenza ta’ obbligazzjonijiet mhux remunerati fil-karta tal-bilanċ tal-BĊE.

Minkejja dan, il-materjalizzazzjoni kontinwa tar-riskju taċ-ċaqliq fir-rata tal-imgħax wasslet għal aktar telf fl-2024. Dan it-telf kien xprunat l-aktar mill-kost tal-obbligazzjonijiet tal-BĊE li jaqbżu l-imgħax miksub fuq l-assi tiegħu. Sehem kbir tal-assi tal-BĊE fuq terminu medju sa twil b’kupuni b’rata fissa nkiseb meta r-rati tal-imgħax kienu baxxi ħafna jew saħansitra żero. Dawn komplew jiġu ffinanzjati prinċipalment minn obbligazzjonijiet fuq terminu qasir li, sa tmiem l-2024, kienu remunerati bir-rata tal-MRO. Filwaqt li l-BĊE jistenna li se jirritorna jagħmel profitt, il-possibbiltà ta’ aktar telf fis-snin li ġejjin ma tistax tiġi eskluża. Jekk dan ikun il-każ, kwalunkwe telf bħal dan huwa mistenni li jkun iżgħar minn dak imġarrab fl-2023 u fl-2024.

Ir-riskji assoċjati mat-tibdil fil-klima qed jiġu inkorporati gradwalment fil-qafas tal-ġestjoni tar-riskju tal-BĊE. Fl-2022, l-Eurosistema wettqet l-ewwel test tal-istress relatat mal-klima fuq il-karta tal-bilanċ tal-Eurosistema, u dan ippermetta stima preliminari tal-impatt ta’ dan ir-riskju fuq il-karta tal-bilanċ tal-BĊE.^[26] Test tal-istress klimatiku ieħor twettaq fl-2024, u l-ittestjar tal-istress klimatiku se jkompli jitwettaq fuq bażi regolari fis-snin li ġejjin.^[27]

1.4.2 Riskju operazzjonali

Il-Bord Eżekuttiv huwa responsabbli għal, u japprova l-politika u l-qafas tal-ġestjoni tar-risku operazzjonali (ORM) tal-BĊE.^[28] Il-Kumitat tar-Riskji Operazzjonali (ORC) jappoġġa lill-Bord Eżekuttiv fil-qadi tar-rwol tiegħu fis-sorveljanza tal-ġestjoni tar-riskji operazzjonali. L-ORM hu parti integrali tal-istruttura tal-governanza u l-proċessi ta’ ġestjoni tal-BĊE.^[29]

L-għan ewlieni tal-qafas ORM tal-BĊE hu li jagħti kontribut biex jiżgura li l-BĊE jilħaq il-missjoni u l-għanijiet tiegħu, filwaqt li jħares ir-reputazzjoni u l-assi tiegħu kontra t-telf, l-użu ħażin u d-danni. Fil-qafas tal-ORM, kull qasam ta’ ħidma huwa responsabbli biex jidentifika, jivvaluta, jirreaġixxi għal, jirrapporta dwar u jissorvelja r-riskji, l-inċidenti u l-kontrolli operazzjonali tiegħu. F’dan il-kuntest, il-politika tal-BĊE relatata mat-tolleranza tar-riskju tipprovdi gwida dwar l-istrateġiji ta’ reazzjoni għar-riskju u l-proċeduri ta’ aċċettazzjoni tar-riskju. Hija marbuta ma’ matriċi ta’ riskju ta’ ħamsa b’ħamsa abbażi ta’ skali ta’ gradazzjoni tal-impatt u l-probabbiltà bl-applikazzjoni ta’ kriterji kwantitattivi u kwalitattivi.

L-ambjent li fih jopera l-BĊE huwa espost għal theddid dejjem aktar kumpless u interkonness u hemm firxa wiesgħa ta’ riskji operazzjonali assoċjati mal-attivitajiet ta’ kuljum tal-BĊE. L-oqsma ewlenin ta’ tħassib għall-BĊE jinkludu firxa wiesgħa ta’ riskji mhux finanzjarji li jirriżultaw minn nies, sistemi, proċessi u avvenimenti esterni. Konsegwentement, il-BĊE stabbilixxa proċessi biex jiffaċilita ġestjoni kontinwa u effettiva tar-riskji operazzjonali tiegħu u biex jintegra l-informazzjoni dwar ir-riskju fil-proċess deċiżjonali. Barra minn hekk, il-BĊE qed ikompli jiffoka fuq it-tisħiħ tar-reżiljenza tiegħu u jqis ir-riskji b’mod wiesa’ u l-opportunitajiet minn perspettiva minn tarf sa tarf, inklużi l-aspetti tas-sostenibbiltà. Ġew stabbiliti strutturi ta’ reazzjoni u pjani ta’ kontinġenza biex tiġi żgurata l-kontinwità tal-funzjonijiet kritiċi tan-negożju f’każ ta’ xi tfixkil jew kriżi.

1.4.3 Riskju tal-kondotta

Il-BĊE għandu Uffiċċju ta’ Konformità u Governanza bħala funzjoni ewlenija tal-ġestjoni tar-riskju biex isaħħaħ il-qafas tal-governanza tal-BĊE sabiex jindirizza r-riskju tal-kondotta.^[30] L-għan tiegħu huwa li jappoġġja lill-Bord Eżekuttiv fil-protezzjoni tal-integrità u r-reputazzjoni tal-BĊE, li jippromwovi standards etiċi ta’ mġiba u li jsaħħaħ ir-responsabbiltà u t-trasparenza tal-BĊE. Kumitat għall-Etika indipendenti jipprovdi pariri u gwida lil uffiċjali għolja tal-BĊE dwar kwistjonijiet ta’ integrità u kondotta u jappoġġa lill-Kunsill Governattiv fil-ġestjoni tar-riskji fil-livell eżekuttiv b’mod xieraq u koerenti. Fil-livell tal-Eurosistema u l-Mekkaniżmu Superviżorju Uniku (SSM) il-Kumitat għall-Etika u l-Konformità jaħdem biex tinkiseb implimentazzjoni koerenti tal-oqfsa tal-kondotta għall-BĊNi u l-awtoritajiet nazzjonali kompetenti (NCAs).

Fl-2024, il-BĊE u seba’ istituzzjonijiet oħra tal-UE qablu li jistabbilixxu “Korp tal-Etika tal-UE” biex isaħħaħ l-etika, l-integrità u l-istandards relatati tat-trasparenza u tal-akkontabbiltà fit-teħid tad-deċiżjonijiet Ewropej.^[31] Il-ftehim ġie ffirmat fil-15 ta’ Mejju 2024 u daħal fis-seħħ fis-6 ta’ Ġunju 2024.^[32] Il-kompitu ewlieni tal-Korp tal-Etika l-ġdid tal-UE huwa li jiżviluppa standards minimi komuni għall-imġiba ta’ uffiċjali ta’ livell għoli. Fil-BĊE, l-ambitu jkopri membri tal-Bord Eżekuttiv, il-Kunsill Governattiv u l-Bord Superviżorju. Huwa mistenni li l-implimentazzjoni ta’ standards komuni futuri se jkollha effett ta’ benefiċċju fuq l-imġiba etika, inklużi r-riskji assoċjati.

2 Rapporti finanzjarji tal-BĊE

2.1 Karta tal-bilanċ fil-31 ta’ Diċembru 2024

2.2 Kont tal-profitt u t-telf għas-sena li ntemmet fil-31 ta’ Diċembru 2024

Frankfurt am Main, 11 ta’ Frar 2025
Bank Ċentrali Ewropew

Christine Lagarde
President

2.3 Politika tal-kontabilità

Forma u preżentazzjoni tar-rapporti finanzjarji

Ir-rapporti finanzjarji tal-BĊE tfasslu skont il-politika ta’ kontabilità li ġejja,^[33] li, fil-fehma tal-Kunsill Governattiv tal-BĊE, jagħtu preżentazzjoni ġusta tar-rapporti finanzjarji u fl-istess ħin jirriflettu n-natura tal-attivitajiet ta’ bank ċentrali.

Prinċipji tal-kontabilità

Ġew applikati l-prinċipji tal-kontabilità li ġejjin: realtà u trasparenza ekonomika, prudenza, għarfien ta’ avvenimenti ta’ wara l-karta tal-bilanċ, materjalità, negozju avvjat, prinċipju tad-dovuti, konsistenza u komparabbiltà.

Rikonoxximent tal-assi u l-obbligazzjonijiet

Assi jew obbligazzjoni jidhru fil-karta tal-bilanċ biss meta jkun probabbli li kull benefiċċju ekonomiku futur marbut magħhom jgħaddi lil jew mingħand il-BĊE, meta sostanzjalment ir-riskji u l-gwadanji kollha assoċjati magħhom ikunu ġew trasferiti lill-BĊE, u meta l-kost jew il-valur tal-assi jew l-ammont tal-obbligazzjoni jkunu jistgħu jiġu kalkulati b’mod affidabbli.

Bażi tal-kontabilità

Il-kontijiet tħejjew abbażi tal-kost storiku, modifikat biex jinkludi l-valutazzjoni tas-suq tat-titoli negozjabbli (barra titoli ta’ dejn attwalment miżmumin għall-għanijiet tal-politika monetarja), tad-deheb u tal-assi u l-obbligazzjonijiet l-oħra kollha inklużi fil-karta tal-bilanċ u esklużi minnha denominati f’munita barranija.

It-tranżazzjonijiet f’assi u obbligazzjonijiet finanzjarji jidhru fil-kontijiet bid-data meta jkunu ġew konklużi.

Bl-eċċezzjoni tat-tranżazzjonijiet spot f’titoli, it-tranżazzjonijiet fi strumenti finanzjarji denominati f’muniti barranin jidħlu fil-kontijiet esklużi mill-karta tal-bilanċ bid-data ta’ meta jkunu saru. Fid-data tal-ħlas, l-entrati esklużi mill-karta tal-bilanċ jiġu riversjati, u t-tranżazzjonijiet jiddaħħlu fil-karta tal-bilanċ. Ix-xiri u l-bejgħ ta’ munita barranija jaffettwa l-pożizzjoni netta f’munita barranija fid-data ta’ meta jkun sar, u r-riżultati realizzati mill-bejgħ jiġu kalkulati wkoll f’din id-data. L-imgħax, il-primjums u l-iskontijiet dovuti relatati mal-istrumenti finanzjarji denominati f’muniti barranin jiġu kalkulati u rreġistrati kuljum, u l-pożizzjoni f’munita barranija tiġi affettwata wkoll kuljum minn dawn id-dovuti.

Assi u obbligazzjonijiet f’deheb u f’munita barranija

L-assi u l-obbligazzjonijiet denominati f’munita barranija jinqalbu f’euro bir-rata tal-kambju tad-data tal-karta tal-bilanċ. L-introjtu u l-ispejjeż jinqalbu bir-rata tal-kambju tad-data meta jiġu rreġistrati. Ir-rivalwazzjoni ta’ assi u obbligazzjonijiet tal-kambju barrani, fosthom l-istrumenti inklużi fil-karta tal-bilanċ u esklużi minnha, issir għal kull munita individwali.

Ir-rivalwazzjoni bil-prezz tas-suq ta’ assi u obbligazzjonijiet denominati f’muniti barranin tinħadem b’mod separat mir-rivalwazzjoni tar-rata tal-kambju.

Id-deheb jiġi valwat bil-prezz tas-suq prevalenti fid-data tal-karta tal-bilanċ. Ma ssir ebda distinzjoni bejn id-differenzi fir-rivalwazzjoni tal-prezz u tal-munita fil-każ tad-deheb. Minflok, valwazzjoni waħda tad-deheb hija kontabilizzata abbażi tal-prezz f’euro għal kull uqija fina ta’ deheb, li, għas-sena li ntemmet fil-31 ta’ Diċembru 2024, kienet derivata mir-rata tal-kambju tal-euro kontra d-dollaru Amerikan fil-31 ta’ Diċembru 2024.

Id-dritt speċjali ta’ kreditu (SDR) jiġi definit f’termini ta’ basket ta’ muniti u l-valur tiegħu jiġi determinat mis-somma ppeżata tar-rati tal-kambju ta’ ħames valuti kbar (id-dollaru Amerikan, l-euro, ir-renminbi Ċiniż, il-yen Ġappuniż u l-lira sterlina). L-investimenti tal-BĊE f’SDRs inqelbu f’euro bir-rata tal-kambju tal-euro kontra l-SDR tal-31 ta’ Diċembru 2024.

Titoli

Titoli miżmumin għall-għanijiet tal-politika monetarja
It-titoli tad-dejn miżmumin attwalment għall-għanijiet tal-politika monetarja jidħlu fil-kontijiet b’kost amortizzat soġġett għal indeboliment.

Titoli oħra
It-titoli negozjabbli (barra dawk miżmumin għall-għanijiet tal-politika monetarja) u assi simili jiġu valwati jew bil-prezzijiet medji tas-suq jew abbażi tal-kurvi tar-redditi rilevanti fid-data tal-karta tal-bilanċ, għal kull titolu individwali. L-opzjonijiet inkorporati fit-titoli ma jiġux separati għall-għanijiet tal-valutazzjoni. Għas-sena li ntemmet fil-31 ta’ Diċembru 2024, intużaw il-prezzijiet medji tas-suq tat-30 ta’ Diċembru 2024.

Fondi ta’ investiment negozjabbli jiġu rivalwati fuq bażi netta fuq livell ta’ fond, bl-użu tal-valur nett tal-assi tagħhom. Ma jiġi applikat ebda nnettjar bejn gwadanni u telf mhux realizzati f’fondi ta’ investiment differenti.

Ishma azzjonarji illikwidi u strumenti azzjonarji oħra miżmumin bħala investimenti permanenti jiġu valwati bil-prezz tal-akkwist soġġett għal indeboliment.

Rikonoxximent tal-introjtu

L-introjtu u l-ispejjeż jiġu rikonoxxuti fil-perjodu meta jidħlu jew meta jiġġarrbu.^[34] Il-profitt u telf realizzati li jirriżultaw mill-bejgħ ta’ muniti barranin, deheb u titoli jiġu rreġistrati fil-kont tal-profitt u t-telf. Dawn il-gwadanni u t-telf realizzati jiġu kkalkulati b’referenza għall-kost medju tal-assi rispettivi.

Il-gwadanni mhux realizzati mhumiex rikonoxxuti bħala introjtu u jiġu trasferiti direttament f’kont ta’ rivalwazzjoni.

It-telf mhux realizzat jiġi rreġistrat fil-kont tal-profitt u t-telf jekk, fl-aħħar tas-sena, ikun ikbar mill-gwadanni tar-rivalwazzjoni preċedenti akkumulati fil-kont ta’ rivalwazzjoni rispettiv. Dan it-telf mhux realizzat fuq kwalunkwe titolu jew munita jew fuq id-deheb ma jiġix innettjat kontra l-gwadanni mhux realizzati fuq titoli jew muniti oħra jew deheb. Fil-każ li dan it-telf mhux realizzat minn xi partita jiġi reġistrat fil-kont tal-profitt u t-telf, il-kost medju ta’ din il-partita jitnaqqas bir-rata tal-kambju jew bil-prezz tas-suq tal-aħħar tas-sena.

It-telf mill-indeboliment jiġi rreġistrat fil-kont tal-profitt u t-telf u ma jiġix riversjat fis-snin ta’ wara ħlief jekk l-indeboliment jonqos u t-tnaqqis jista’ jiġi attribwit ma’ avveniment osservabbli li jseħħ wara li l-indeboliment ikun ġie rreġistrat għall-ewwel darba.

Primjums jew skontijiet fuq titoli jiġu amortizzati fuq il-bqija tal-ħajja kuntrattwali tat-titoli.

Tranżazzjonijiet riversjati

It-tranżazzjonijiet riversjati huma operazzjonijiet fejn il-BĊE jixtri jew ibigħ assi bi ftehim ta’ riakkwist jew jagħmel operazzjonijiet ta’ kreditu bil-kollateral.

Fi ftehim ta’ riakkwist, it-titoli jinbiegħu bi flus kontanti bi ftehim li jsir fl-istess ħin biex jerġgħu jinxtraw mingħand il-kontroparti bi prezz miftiehem f’data stabbilita fil-ġejjieni. Ftehimiet ta’ riakkwist jidħlu fil-kontijiet bħala depożiti kollateralizzati fuq in-naħa tal-obbligazzjonijiet tal-karta tal-bilanċ. Titoli mibjugħin b’tali ftehim jibqgħu fuq il-karta tal-bilanċ tal-BĊE.

Fi ftehim ta’ riakkwist riversjat, it-titoli jinxtraw bi flus kontanti bi ftehim li jsir fl-istess ħin biex jerġgħu jinbiegħu lill-kontroparti bi prezz miftiehem f’data stabbilita fil-ġejjieni. Ftehimiet ta’ riakkwist riversjat jiġu reġistrati fil-kontijiet bħala self kollateralizzat fuq in-naħa tal-assi tal-karta tal-bilanċ iżda ma jiġux inklużi fl-investimenti f’titoli tal-BĊE.

It-tranżazzjonijiet riversjati (fosthom tranżazzjonijiet ta’ self ta’ titoli) li jsiru fi programm offrut minn istituzzjoni speċjalizzata jiġu rreġistrati biss fil-karta tal-bilanċ meta jiġi pprovdut kollateral fi flus kontanti u dawn il-flus kontanti jibqgħu ma jiġux investiti.

Strumenti barra l-karta tal-bilanċ

L-istrumenti tal-munita, jiġifieri t-tranżazzjonijiet forward tal-kambju barrani, il-forward legs tal-iswaps tal-kambju barrani u strumenti oħra tal-munita li jinvolvu l-kambju minn munita għall-oħra f’data fil-ġejjieni, jiġu inklużi fil-pożizzjoni netta tal-munita barranija biex jiġi kalkulat il-gwadann u t-telf mill-kambju barrani.

L-istrumenti tar-rati tal-imgħax jiġu rivalwati individwalment. Bidliet ta’ kuljum fil-marġni ta’ varjazzjoni tar-rata tal-imgħax ta’ kuntratti futures miftuħin jidħlu fil-kont tal-profitt u t-telf.

Il-valwazzjoni tat-tranżazzjonijiet forward f’titoli ssir mill-BĊE u tinħadem b’metodi ta’ valwazzjoni aċċettati b’mod ġenerali bi prezzijiet u b’rati osservabbli tas-suq, kif ukoll bħala fatturi ta’ skont mid-dati tal-konklużjoni tat-tranżazzjonijiet sad-data tal-valutazzjoni.

Assi fissi

Assi fissi, fosthom assi intanġibbli iżda bl-esklużjoni tal-artijiet u x-xogħlijiet tal-arti, jiġu valwati bil-prezz tal-akkwist li minnu jitnaqqas id-deprezzament. L-artijiet u x-xogħlijiet tal-arti jiġu valwati bil-prezz tal-akkwist. Il-bini ewlieni tal-BĊE jiġi valwat bil-prezz tal-akkwist bid-deprezzament imnaqqas u soġġett għall-indeboliment. Għad-deprezzament tal-bini ewlieni tal-BĊE, il-kostijiet jiġu assenjati lill-komponenti xierqa tal-assi li jiġu deprezzati skont il-kalkolu tal-ħajja utli tagħhom. Id-deprezzament jiġi kalkolat bil-metodu straight-line matul il-ħajja utli mistennija tal-assi, mit-trimestru wara li l-assi jsir disponibbli għall-użu. Il-ħajja utli mistennija għall-kategoriji ewlenin ta’ assi tidher hawn taħt:

Il-perjodu ta’ deprezzament għall-ispiża kapitalizzata fuq it-tiġdid tal-bini relatata mal-bini mikri bħalissa mill-BĊE ġie aġġustat biex jitqiesu l-avvenimenti li jkollhom impatt fuq il-ħajja utli mistennija tal-assi kkonċernat.

Il-BĊE jwettaq test annwali ta’ indeboliment tal-bini ewlieni tiegħu u assi bid-dritt tal-użu relatati mal-bini tal-uffiċċji (ara "Lokazzjonijiet" hawn taħt). Jekk jiġi identifikat indikatur tal-indeboliment u jiġi stmat li l-assi jista’ jkun fi stat ta’ indeboliment, issir stima tal-ammont rekuperabbli. Telf minħabba indeboliment jiġi reġistrat fil-kont tal-profitt u t-telf jekk l-ammont rekuperabbli jkun inqas mill-valur nominali nett.

Assi fissi li jiswew inqas minn EUR 10,000 jiġu mħassra fis-sena tal-akkwist.

Assi fissi li jikkonformaw mal-kriterji ta’ kapitalizzazzjoni iżda li jkunu għadhom qegħdin jinbnew jew jiġu żviluppati jiġu rreġistrati taħt “Assi li qegħdin jinbnew”. Il-kostijiet relatati huma trasferiti għall-klassijiet rilevanti tal-assi fissi ladarba l-assi jkunu disponibbli għall-użu.

Lokazzjonijiet

Il-BĊE jaġixxi kemm bħala lokatarju kif ukoll bħala sublokatur.

Il-BĊE bħala lokatarju
Għal-lokazzjonijiet kollha li għalihom il-BĊE huwa lokatarju u li jinvolvu assi tanġibbli, l-assi tad-dritt tal-użu u l-obbligazzjoni tal-lokazzjoni relatati huma rikonoxxuti fil-karta tal-bilanċ fid-data tal-bidu tal-lokazzjoni, jiġifieri ladarba l-assi jkun disponibbli għall-użu, u jiġu inklużi taħt il-klassijiet rilevanti tal-assi fissi ta’ “Assi fissi tanġibbli u intanġibbli” u taħt “Varji” (obbligazzjonijiet) rispettivament. Fejn il-lokazzjonijiet jikkonformaw mal-kriterji tal-kapitalizzazzjoni, iżda l-assi involut ikun għadu qed jinbena jew jiġi adattat, il-kostijiet imġarrba qabel id-data tal-bidu tal-kirja jiġu rreġistrati taħt “Assi taħt kostruzzjoni”.

Assi marbuta mad-dritt tal-użu jiġu valwati bil-prezz tal-akkwist bid-deprezzament imnaqqas. Barra minn hekk, assi bid-dritt tal-użu relatati ma’ binjiet ta’ uffiċċji huma soġġetti għal indeboliment (għal aktar informazzjoni dwar it-test annwali tal-indeboliment, ara “Assi fissi” hawn fuq). Id-deprezzament jiġi kkalkolat fuq bażi straight-line mid-data tal-bidu tal-lokazzjoni sa, jew it-tmiem tal-ħajja utli tal-assi bid-dritt ta’ użu jew it-tmiem tal-perjodu tal-lokazzjoni, skont liema jiġi l-ewwel.

L-obbligazzjoni tal-lokazzjoni titkejjel inizjalment bil-valur preżenti tal-pagamenti futuri tal-lokazzjoni (li jinkludu biss komponenti tal-kirja), skontati bl-użu tar-rata inkrementali tas-self tal-BĊE. Sussegwentement, ir-responsabbiltà tal-lokazzjoni titkejjel b’kost amortizzat bl-użu tal-metodu ta’ imgħax effettiv. L-ispiża tal-imgħax relatata tiġi rreġistrata fil-kont tal-profitt u t-telf taħt "Spejjeż oħra tal-imgħax". Meta jkun hemm bidla fil-pagamenti ta’ lokazzjoni futura li tirriżulta minn bidla f’indiċi jew minn rivalwazzjoni oħra tal-kuntratt eżistenti, ir-responsabbiltà tal-lokazzjoni titkejjel mill-ġdid. Kull kejl mill-ġdid bħal dan jirriżulta f’aġġustament korrispondenti għall-ammont miżmum fil-kotba tal-assi bid-dritt tal-użu.

Kirjiet għal żmien qasir b’tul ta’ 12-il xahar jew inqas u kirjiet ta’ assi ta’ valur baxx taħt EUR 10,000 (konsistenti mal-limitu użat għar-rikonoxximent ta’ assi fissi) jiġu rreġistrati bħala spiża fil-kont tal-profitt u t-telf.

Il-BĊE bħala sublokatur
Għal-lokazzjonijiet kollha li għalihom il-BĊE huwa sublokatur, il-BĊE jagħti lil partijiet terzi d-dritt li jużaw l-assi sottostanti (jew parti minn dak l-assi), filwaqt li l-lokazzjoni bejn is-sid oriġinali u l-BĊE (il-kirja prinċipali) tibqa’ fis-seħħ. Is-sublokazzjoni hija kklassifikata bħala lokazzjoni finanzjarja jew operatorja b’^[35]referenza għall-assi tad-dritt tal-użu li tirriżulta mil-lokazzjoni prinċipali, aktar milli b’referenza għall-assi sottostanti.

Is-sublokazzjonijiet li għalihom il-BĊE huwa sublokatur huma kklassifikati bħala lokazzjoni finanzjarja u l-BĊE jirtira r-rikonoxximent mill-“Assi fissi tanġibbli u intanġibbli” l-assi tad-dritt tal-użu li għandhom x’jaqsmu mal-lokazzjoni prinċipali (jew parti minn tali assi) li jiġi ttrasferit lis-sublokatarju, u jirrikonoxxi taħt “Varji” (assi) sublokazzjoni riċevibbli. L-obbligazzjoni ta’ lokazzjoni relatata mal-lokazzjoni prinċipali tibqa’ mhux affettwata mis-sublokazzjoni.

Fid-data tal-bidu tal-kirja, ir-riċevibbli tas-sublokazzjoni inizjalment jitkejjel bil-valur preżenti tal-ħlasijiet tal-kiri futuri li jakkumulaw għall-BĊE, skontati bl-użu tar-rata ta’ skont użata għall-lokazzjoni prinċipali. Sussegwentement, ir-riċevibbli tal-kirja jitkejjel b’kost amortizzat bl-użu tal-metodu ta’ imgħax effettiv. L-introjtu tal-imgħax relatat jiġi rreġistrat fil-kont tal-profitt u t-telf taħt "Spejjeż oħra tal-imgħax".

Il-benefiċċji tal-BĊE ta’ wara l-impjieg u benefiċċji oħra fit-tul

Il-BĊE jħaddem skemi ta’ benefiċċji definiti għall-persunal tiegħu u għall-membri tal-Bord Eżekuttiv, kif ukoll għall-membri tal-Bord Superviżorju impjegati mill-BĊE.

L-iskema tal-pensjoni tal-persunal hija finanzjata b’assi miżmumin f’fond ta’ benefiċċji fit-tul għall-impjegati. Il-kontribuzzjonijiet obbligatorji li jsiru mill-BĊE u mill-persunal huma riflessi fl-istruttura ta’ benefiċċji definiti tal-iskema. Il-persunal jista’ jagħmel kontribuzzjonijiet supplimentari fuq bażi volontarja fi skema ta’ kontribuzzjonijiet definiti li tista’ tintuża biex tipprovdi benefiċċji addizzjonali.^[36] Dawn il-benefiċċji addizzjonali jiġu kkalkolati bl-ammont tal-kontribuzzjonijiet volontarji flimkien mar-redditi mill-investiment li jiġu minn dawk il-kontribuzzjonijiet.

Hemm provvedimenti mhux finanzjati għall-benefiċċji ta’ wara l-impjieg u benefiċċji oħra fit-tul tal-membri tal-Bord Eżekuttiv tal-BĊE u l-membri tal-Bord Superviżorju impjegati mill-BĊE. Għall-membri tal-persunal hemm arranġamenti mhux iffinanzjati għall-benefiċċji ta’ wara l-impjieg, barra l-pensjonijiet, u għal benefiċċji oħra fit-tul.

Obbligazzjoni tal-benefiċċji definiti netti
L-obbligazzjoni rikonoxxuta fil-karta tal-bilanċ fil-partita “Varji” (obbligazzjonijiet) fir-rigward tal-iskemi tal-benefiċċji definiti, inklużi benefiċċji oħra fit-tul, hi l-valur attwali tal-obbligu tal-benefiċċji definiti fid-data tal-karta tal-bilanċ, li minnu jitnaqqas il-valur ġust tal-assi tal-iskema użati biex jiffinanzjaw l-obbligu.

L-obbligu tal-benefiċċji definiti jiġi kalkulat kull sena minn attwarji indipendenti bl-użu tal-metodu tal-unità ta’ kreditu prevista. Il-valur attwali tal-obbligu tal-benefiċċji definiti jiġi kalkolat billi l-flussi tal-flus futuri stmati jiġu skontati b’rata li tiġi determinata b’referenza għar-redditi tas-suq fid-data tal-karta tal-bilanċ ta’ bonds korporattivi ta’ kwalità għolja denominati f’euro li jkollhom l-istess termini ta’ maturità bħal dawk tal-obbligu relatat.

Il-gwadanni u t-telf attwarji jistgħu jirriżultaw minn aġġustamenti għall-esperjenza (fejn ir-riżultati attwali jkunu differenti mis-suppożizzjonijiet attwarji li jkunu saru qabel) u minn bidliet fis-suppożizzjonijiet attwarji.

Kost nett tal-benefiċċji definiti
Il-kost nett tal-benefiċċji definiti jinqasam f’komponenti li jidħlu fil-kont tal-profitt u t-telf u kalkoli ġodda fir-rigward tal-benefiċċji ta’ wara l-impjieg li jidħlu fil-“Kontijiet ta’ rivalwazzjoni” tal-karta tal-bilanċ.

L-ammont nett li jidħol fil-kont tal-profitt u t-telf jiġbor fih:

1. il-kost kurrenti tas-servizz tal-benefiċċji definiti dovuti għas-sena;
2. il-kost tas-servizz tal-passat, jekk preżenti, tal-benefiċċji definiti li tirriżulta minn emenda fl-iskema;
3. l-imgħax nett bir-rata ta’ skont fuq l-obbligazzjoni netta tal-benefiċċji definiti;
4. il-kalkoli ġodda fir-rigward ta’ benefiċċji oħra fit-tul, fit-totalità tagħhom.

L-ammont nett li jidher fil-“Kontijiet ta’ rivalwazzjoni” jinkludi l-partiti li ġejjin:

1. gwadanni u telf attwarji fir-rigward ta’ benefiċċji ta’ wara l-impjieg;
2. ir-redditu attwali fuq l-assi tal-iskema, minbarra l-ammonti inklużi fl-imgħax nett fuq l-obbligazzjoni netta tal-benefiċċji definiti.

Dawn l-ammonti jiġu valwati kull sena minn attwarji indipendenti biex tiġi stabbilita l-obbligazzjoni xierqa li trid tiġi rikonoxxuta fir-rapporti finanzjarji.

Bilanċi fi ħdan is-SEBĊ/bilanċi fi ħdan l-Eurosistema

Il-bilanċi fi ħdan is-SEBĊ jiġu primarjament mill-ħlasijiet transkonfinali fl-Unjoni Ewropea (UE) li jiġu konklużi f’euro bi flus tal-banek ċentrali. Dawn it-tranżazzjonijiet fil-biċċa l-kbira tagħhom isiru minn entitajiet privati (eż. istituzzjonijiet ta’ kreditu, korporazzjonijiet u individwi). Jiġu konklużi f’TARGET – Trans-European Automated Real-time Gross settlement Express Transfer system – u joħolqu bilanċi bilaterali fil-kontijiet ta’ TARGET tal-banek ċentrali tal-UE. Il-ħlasijiet li jsiru mill-BĊE u mill-banek ċentrali nazzjonali (BĊNi) jaffettwaw ukoll dawn il-kontijiet. Kull saldu jiġi awtomatikament aggregat u aġġustat biex jifforma parti minn pożizzjoni waħda għal kull BĊN fil-konfront tal-BĊE. Dawn il-pożizzjonijiet fil-kotba tal-BĊE jirrappreżentaw il-pretensjoni netta jew l-obbligazzjoni netta ta’ kull BĊN kontra l-bqija tas-Sistema Ewropea ta’ Banek Ċentrali (SEBĊ). Il-movimenti fil-kontijiet ta’ TARGET huma riflessi fir-rekords tal-kontabilità tal-BĊE u tal-BĊNi fuq bażi ta’ kuljum.

Il-bilanċi fi ħdan l-Eurosistema tal-BĊNi taż-żona tal-euro vis-à-vis il-BĊE li jirriżultaw minn TARGET huma ppreżentati fil-karta tal-bilanċ tal-BĊE bħala pożizzjoni waħda netta tal-assi jew tal-obbligazzjonijiet u jidhru taħt “Pretensjonijiet relatati ma’ TARGET (netti)” jew “Obbligazzjonijiet relatati ma’ TARGET (netti)”. Il-bilanċi f’intra-SEBĊ ta’ BĊNi barra ż-żona tal-euro meta mqabbla mal-BĊE, li jirriżultaw mill-parteċipazzjoni tagħhom f’TARGET,^[37] huma divulgati taħt “Obbligazzjonijiet lejn persuni mhux residenti fiż-żona tal-euro denominati f’euro”.

Il-bilanċi fi ħdan l-Eurosistema mill-allokazzjoni ta’ karti tal-flus tal-euro fl-Eurosistema jidħlu bħala assi wieħed nett fi “Pretensjonijiet relatati mal-allokazzjoni ta’ karti tal-flus tal-euro fi ħdan l-Eurosistema” (ara “Karti tal-flus fiċ-ċirkolazzjoni” hawn taħt).

Il-bilanċi fi ħdan l-Eurosistema mit-trasferiment ta’ assi f’riżervi barranin lill-BĊE mill-BĊNi li jissieħbu fl-Eurosistema huma denominati f’euro u jidħlu f’“Obbligazzjonijiet ekwivalenti għat-trasferiment ta’ riżervi barranin”.

Bilanċi oħra intra-Eurosistema denominati f’euro (eż. it-tqassim tal-profitt interim tal-BĊE lill-BĊNi, jekk ikun hemm), huma ppreżentati fil-karta tal-bilanċ tal-BĊE bħala pożizzjoni waħda netta tal-assi jew tal-obbligazzjonijiet taħt “Pretensjonijiet oħra fi ħdan l-Eurosistema (netti)” jew “Obbligazzjonijiet oħra fi ħdan l-Eurosistema (netti)”.

Karti tal-flus fiċ-ċirkolazzjoni

Il-BĊE u l-BĊNi taż-żona tal-euro, li flimkien jikkostitwixxu l-Eurosistema, joħorġu l-karti tal-flus tal-euro.^[38] Il-valur totali tal-karti tal-flus tal-euro fiċ-ċirkolazzjoni jiġi allokat lill-banek ċentrali tal-Eurosistema fl-aħħar jum tax-xogħol ta’ kull xahar skont l-iskema tal-allokazzjoni tal-karti tal-flus.^[39]

Il-BĊE ġie allokat sehem ta’ 8% tal-valur totali tal-karti tal-flus tal-euro fiċ-ċirkolazzjoni, li huwa divulgat fil-karta tal-bilanċ fil-partita tal-obbligazzjonijiet “Karti tal-flus fiċ-ċirkolazzjoni”. Is-sehem tal-BĊE fil-karti tal-flus tal-euro fiċ-ċirkolazzjoni huwa kopert bi pretensjonijiet fil-konfront tal-BĊNi. Dawn il-pretensjonijiet, li jrendu l-imgħax,^[40] jidhru fi “Pretensjonijiet relatati mal-allokazzjoni ta’ karti tal-flus tal-euro fi ħdan l-Eurosistema” (ara “Bilanċi fi ħdan is-SEBĊ/bilanċi fi ħdan l-Eurosistema” hawn fuq). L-introjtu mill-imgħax fuq dawn il-pretensjonijiet huwa inkluż fil-kont tal-profitt u t-telf taħt "Introjtu mill-imgħax".

Provvediment kontra riskji finanzjarji

Il-Kunsill Governattiv jista’ jiddeċiedi li jittrasferixxi dan l-introjtu tal-BĊE kollu jew parti minnu għal provvediment kontra riskji finanzjarji. Dan il-provvediment jista’ jintuża sal-grad meqjus bħala meħtieġ mill-Kunsill Governattiv sabiex jiġi paċut telf li jseħħ bħala riżultat ta’ skoperturi għal riskji finanzjarji. Id-daqs u l-ħtieġa kontinwa għal dan il-provvediment kontra riskji finanzjarji jiġu rieżaminati kull sena, skont il-valwazzjoni tal-BĊE tal-iskopertura tiegħu għal dawn ir-riskji filwaqt li titqies firxa ta’ fatturi, sakemm (i) id-daqs tiegħu ma jkunx żero, u (ii) hemm introjtu tal-BĊE li jiġi trasferit lilu.^[41]

Tqassim tal-profitti interim

Ammont li jkun daqs l-introjtu tal-BĊE mill-karti tal-flus tal-euro fiċ-ċirkolazzjoni u l-introjtu mit-titoli tad-dejn miżmumin għall-għanijiet tal-politika monetarja mixtrija (i) fil-Programm tas-Swieq tat-Titoli; (ii) fit-tielet programm ta’ xiri ta’ bonds garantiti; (iii) fil-programm ta’ xiri ta’ titoli koperti b’assi; (iv) fil-programm ta’ xiri ta’ assi mis-settur pubbliku; u (v) fil-programm ta’ xiri tal-emerġenza pandemika jitqassam f’Jannar tas-sena ta’ wara permezz ta’ tqassim tal-profitti interim, sakemm il-Kunsill Governattiv ma jiddeċidix mod ieħor.^[42] Kull deċiżjoni ta’ dan it-tip tittieħed meta, fuq il-bażi ta’ stima motivata mħejjija mill-Bord Eżekuttiv, il-Kunsill Governattiv jistenna li l-BĊE jkollu telf ġenerali annwali jew jagħmel profitt annwali li jkun inqas minn dan l-introjtu. Il-Kunsill Governattiv jista’ jiddeċiedi wkoll li jittrasferixxi dan l-introjtu kollu jew parti minnu għal provvediment għal riskji finanzjarji (ara “Provvediment għal riskji finanzjarji” fuq).

Barra minn hekk, il-Kunsill Governattiv jista’ jiddeċiedi li jnaqqas l-ammont tal-introjtu fuq il-karti tal-flus tal-euro fiċ-ċirkolazzjoni li għandu jitqassam f’Jannar bl-ammont tal-kostijiet imġarrbin mill-BĊE fir-rigward tal-ħruġ u l-ipproċessar tal-karti tal-flus tal-euro.

Avvenimenti post-karta tal-bilanċ

Il-valuri tal-assi u l-obbligazzjonijiet jiġu aġġustati għal avvenimenti li jseħħu bejn id-data tal-karta tal-bilanċ annwali u d-data meta l-Bord Eżekuttiv jawtorizza l-preżentazzjoni tal-Kontijiet Annwali tal-BĊE għall-approvazzjoni tal-Kunsill Governattiv, jekk dawn l-avvenimenti jaffettwaw materjalment il-kundizzjoni tal-assi u l-obbligazzjonijiet fid-data tal-karta tal-bilanċ.

Avvenimenti importanti post karta tal-bilanċ li ma jaffettwawx il-kundizzjoni tal-assi u l-obbligazzjonijiet fid-data tal-karta tal-bilanċ jidhru fin-noti.

Bidliet fil-politika tal-kontabilità

Fl-2024 ma kien hemm ebda bidla fil-politika tal-kontabilità applikata mill-BĊE.

Bidliet fl-estimi tal-kontabbiltà

Fl-2024, il-BĊE biddel il-metodu użat biex jakkumula l-introjtu mill-imgħax fuq titoli b’introjtu fiss. L-imgħax fuq il-kupuni, il-primjums u l-iskontijiet fuq dawn it-titoli issa huma rikonoxxuti skont il-metodu tar-rata ta’ redditu interna (IRR). Qabel, il-metodu IRR kien applikat għall-primjums u l-iskontijiet, filwaqt li l-metodu straight-line ġie applikat għall-imgħax fuq il-kupuni. Il-bidla għandha impatt fuq it-twaqqit tar-rikonoxximent tal-introjtu, filwaqt li l-gwadann jew it-telf totali matul it-terminu sħiħ tat-titoli ta’ introjtu fiss jibqgħu mhux affettwati.

Bidliet għall-preżentazzjoni fir-rapporti finanzjarji

Id-Deċiżjoni (UE) 2024/2938 tal-Bank Ċentrali Ewropew tal-14 ta’ Novembru 2024 dwar il-kontijiet annwali tal-Bank Ċentrali Ewropew (BĊE/2024/32) introduċiet bidliet fil-preżentazzjoni tal-partiti “Telf għas-sena” u “Telf akkumulat riportat” fil-karta tal-bilanċ. Fil-Kontijiet Annwali tal-BĊE tal-2023, il-partita “Telf għas-sena” ġiet ippreżentata bħala partita awtonoma fuq in-naħa tal-assi, skont id-Deċiżjoni (UE) 2016/2247 applikabbli tal-Bank Ċentrali Ewropew tat-3 ta’ Novembru 2016 dwar il-kontijiet annwali tal-Bank Ċentrali Ewropew (BĊE/2016/35) applikabbli, kif emendata, filwaqt li ma kien hemm l-ebda telf akkumulat pendenti riportat.^[43] Fil-Kontijiet Annwali tal-BĊE tal-2024, kemm il-“Profitt/(telf) għas-sena” kif ukoll it-“Telf akkumulat riportat” huma ppreżentati bħala partiti negattivi awtonomi fuq in-naħa tal-passiv tal-karta tal-bilanċ.

Barra minn hekk, id-Deċiżjoni (UE) 2024/2938 introduċiet bidliet addizzjonali għat-tqassim tal-karta tal-bilanċ u l-kont tal-profitt u telf tal-BĊE. Dawn jinkludu (i) id-diviżjoni tal-partita “Provvedimenti” fi “Provvedimenti għar-riskju”^[44] u “Provvedimenti oħrajn” fil-karta tal-bilanċ; u (ii) it-tneħħija tad-diżaggregazzjoni taħt “Introjtu mill-imgħax” u “Spiża tal-imgħax” fil-kont tal-profitt u t-telf, filwaqt li tiġi pprovduta l-informazzjoni rilevanti fin-noti ddedikati għall-kontijiet.

Fost affarijiet oħra, dawn il-bidliet huma maħsuba biex irawmu t-trasparenza u jżidu l-valur tal-informazzjoni tar-rapporti finanzjarji tal-BĊE.

Iċ-ċifri komparattivi għall-2023 ġew aġġustati f’dan is-sens. Il-preżentazzjoni tat-telf ta’ EUR 1,266 miljun divulgat għall-2023 bħala partita negattiva fuq in-naħa tal-obbligazzjonijiet tal-karta tal-bilanċ tirriżulta fit-tnaqqis tal-assi u l-obbligazzjonijiet totali għal dik is-sena ta’ EUR 673,229 miljun meta mqabbla mal-EUR 674,496 miljun li ġew iddikjarati fil-Kontijiet Annwali tal-BĊE tal-2023.

Fl-aħħar nett, fl-2024 il-BĊE emenda l-preżentazzjoni tal-introjtu mill-imgħax (eż. imgħax mill-kupuni) u l-ispiża tal-imgħax (eż. amortizzament tal-primjums) għal partiti mhux relatati ma’ operazzjonijiet tal-politika monetarja. Sa issa, ġew applikati modi differenti ta’ nnettjar tal-introjtu mill-imgħax u l-ispiża tal-imgħax taħt “Introjtu mill-imgħax nett” ippreżentati fil-kont tal-profitt u t-telf, skont it-tip ta’ tranżazzjoni. Il-BĊE ddeċieda li, mill-2024, l-imgħax li jakkumula fuq tipi ta’ strumenti individwali f’partita waħda tal-karta bilanċjali jew portafoll wieħed għandu jiġi ppreżentat fuq bażi netta jew taħt “Introjtu mill-imgħax” jew “Spiża tal-imgħax”, skont jekk l-ammont nett fuq it-tip ta’ strument jew portafoll huwiex pożittiv jew negattiv. Din il-preżentazzjoni titqies li tirrifletti aħjar is-sustanza tat-tranżazzjoni u fl-istess ħin tallinja mal-prinċipju tan-nettjar applikat għall-introjtu mill-imgħax u l-ispejjeż li jirriżultaw minn assi u obbligazzjonijiet relatati ma’ operazzjonijiet tal-politika monetarja.^[45] L-ammonti komparabbli għall-2023 ġew aġġustati kif jidher hawn taħt:

Kwistjonijiet oħra

Skont l-Artikolu 27 tal-Istatut tas-SEBĊ, u abbażi ta’ rakkomandazzjoni tal-Kunsill Governattiv, il-Kunsill tal-UE inizjalment approva l-ħatra ta’ Baker Tilly GmbH & Co. KG, Wirtschaftsprüfungsgesellschaft, Düsseldorf (Repubblika Federali tal-Ġermanja) bħala l-awdituri esterni tal-BĊE għal perjodu ta’ ħames snin sa tmiem is-sena finanzjarja 2022. Fl-2023, il-Kunsill tal-UE, abbażi ta’ rakkomandazzjoni mill-Kunsill Governattiv, approva estensjoni ta’ dan il-perjodu b’sentejn oħra sa tmiem is-sena finanzjarja 2024.

2.4 Noti għall-karta tal-bilanċ

Nota 1 - Deheb u ammonti riċevibbli f’deheb

Din il-partita tinkludi l-investimenti tal-BĊE f’deheb:

Iż-żieda fil-valur ekwivalenti f’euro ta’ dawn l-investimenti kien dovut għaż-żieda fil-prezz tas-suq tad-deheb f’termini ta’ euro (ara “Assi u obbligazzjonijiet f’deheb u f’munita barranija” fit-Taqsima 2.3 “Politika tal-kontabilità” u n-nota 15 “Kontijiet ta’ rivalwazzjoni”).

Nota 2 - Pretensjonijiet kontra persuni mhux residenti fiż-żona tal-euro u residenti taż-żona tal-euro denominati f’muniti barranin

Nota 2.1 - Ammonti riċevibbli mill-FMI

Din il-partita tirrappreżenta l-parteċipazzjonijiet tal-BĊE ta’ SDRs; fil-31 ta’ Diċembru 2024 kienu jammontaw għal EUR 2,227 miljun (2023: EUR 2,083 miljun). Il-parteċipazzjonijiet jirriżultaw bħala riżultat ta’ arranġament kummerċjali reċiproku volontarju mal-Fond Monetarju Internazzjonali (FMI) ta’ xiri u bejgħ ta’ SDRs fejn l-FMI huwa awtorizzat jorganizza bejgħ jew xiri ta’ SDRs bl-euro, f’isem il-BĊE, fi ħdan livelli minimi u massimi ta’ investiment. Għall-għanijiet tal-kontabilità, l-SDRs jitqiesu bħala munita barranija (ara “Assi u obbligazzjonijiet f’deheb u f’munita barranija” fit-Taqsima 2.3 “Politika tal-kontabilità”). Il-parteċipazzjonijiet tal-BĊE ta’ SDRs żdiedu fl-2024 bħala riżultat tal-introjtu mill-imgħax miksub matul is-sena. Barra minn hekk, l-apprezzament tal-SDR meta mqabbel mal-euro matul l-2024 ikkontribwixxa għaż-żieda fil-valur ekwivalenti għall-euro ta’ dawn l-investimenti.

Nota 2.2 – Bilanċi ma’ banek u investimenti f’titoli, self estern u assi esterni oħra; u pretensjonijiet fil-konfront ta’ residenti taż-żona tal-euro denominati f’muniti barranin

Dawn iż-żewġ partiti jikkonsistu f’bilanċi ma’ banek u self denominat f’munita barranija, u f’investimenti f’titoli denominati f’dollari Amerikani, yen Ġappuniżi u renminbi Ċiniżi.

Il-valur totali ta’ dawn il-partiti żdied fl-2024, prinċipalment minħabba l-apprezzament tad-dollaru Amerikan meta mqabbel mal-euro u l-investiment mill-ġdid tal-introjtu miksub matul is-sena, primarjament fuq il-portafoll tad-dollaru Amerikan.

L-investimenti netti tal-BĊE f’muniti barranin^[46] kienu kif ġej:

Ma sar ebda intervent tal-kambju barrani matul l-2024.

Nota 3 – Pretensjonijiet oħra kontra istituzzjonijiet ta’ kreditu taż-żona tal-euro denominati f’euro

Fil-31 ta’ Diċembru 2024, din il-partita kienet tikkonsisti mill-bilanċi tal-kont kurrenti ma’ residenti taż-żona tal-euro li kienu jammontaw għal EUR 2 miljun (2023: EUR 17-il miljun).

Nota 4 – Titoli ta’ residenti taż-żona tal-euro denominati f’euro

Nota 4.1 - Titoli miżmuma għall-għanijiet tal-politika monetarja

Fil-31 ta’ Diċembru 2024, din il-partita kienet tikkonsisti f’titoli ta’ dejn akkwistati mill-BĊE taħt il-Programm tas-Swieq tat-Titoli (SMP), it-tielet programm ta’ xiri ta’ bonds garantiti (CBPPs), il-programm ta’ xiri ta’ titoli koperti b’assi (ABSPP), il-programm ta’ xiri mis-settur pubbliku (PSPP) u l-programm ta’ xiri tal-emerġenza pandemika (PEPP).

Il-portafoll tal-programm ta’ xiri ta’ assi (APP)^[47] kompla jonqos fl-2024, hekk kif l-Eurosistema waqfet tinvesti mill-ġdid il-pagamenti kapitali minn titoli li jimmaturaw f’Lulju 2023.^[48]

Fir-rigward tal-PEPP,^[49] wara deċiżjoni tal-Kunsill Governattiv f’Diċembru 2023,^[50] matul l-ewwel nofs tal-2024, l-Eurosistema kompliet tinvesti mill-ġdid, b’mod sħiħ, il-pagamenti kapitali minn titoli li jimmaturaw. Matul it-tieni nofs tas-sena, il-portafoll tal-PEPP naqas b’medja ta’ EUR 7.5 biljun kull xahar, peress li l-Eurosistema ma investitx mill-ġdid il-pagamenti kapitali kollha minn titoli li jimmaturaw. L-investimenti mill-ġdid taħt il-PEPP twaqqfu fi tmiem l-2024.

It-titoli ta’ dejn akkwistati mill-BĊE f’dawn il-programmi jitqiesu fuq bażi tal-kost amortizzat, soġġett għal indeboliment (ara “Titoli” fit-Taqsima 2.3 “Politiki tal-kontabilità”).

Il-kost amortizzat tat-titoli tad-dejn miżmumin mill-BĊE kif ukoll il-valur tas-suq tagħhom^[51] (li ma jidħolx fil-karta tal-bilanċ jew fil-kont tal-profitt u t-telf, u qed jingħata għal finijiet ta’ tqabbil biss) kienu kif ġej:

Il-bidliet matul is-sena fil-kost amortizzat tat-titoli ta’ dejn miżmuma mill-BĊE kienu kif ġej:

Il-Kunsill Governattiv jivvaluta regolarment ir-riskji finanzjarji assoċjati mat-titoli miżmumin f’dawn il-programmi.

F’dan il-kuntest, it-testijiet tal-indeboliment isiru kull sena bl-użu ta’ data ta’ tmiem is-sena, u jiġu approvati mill-Kunsill Governattiv. F’dawn it-testijiet, l-indikaturi tal-indeboliment jiġu valwati separatament għal kull programm. Fil-każijiet fejn jiġu osservati indikaturi tal-indeboliment, issir analiżi oħra biex tikkonferma li l-flussi tal-likwidità tat-titoli bażi ma jkunux ġew affettwati minn avveniment ta’ indeboliment. Skont ir-riżultati tat-testijiet tal-indeboliment ta’ din is-sena, ma ġie reġistrat ebda telf mill-BĊE fuq it-titoli ta’ dejn miżmumin fil-portafolji tiegħu tal-politika monetarja fl-2024.

Il-kost amortizzat^[52] tat-titoli miżmuma mill-Eurosistema kien kif ġej:

Nota 5 - Pretensjonijiet fi ħdan l-Eurosistema

Nota 5.1 - Pretensjonijiet relatati mal-allokazzjoni ta’ karti tal-flus tal-euro fi ħdan l-Eurosistema

Din il-partita tikkonsisti fil-pretensjonijiet tal-BĊE vis-à-vis il-BĊNi taż-żona tal-euro relatati mal-allokazzjoni ta’ karti tal-flus tal-euro fl-Eurosistema (ara “Karti tal-flus fiċ-ċirkolazzjoni” fit-Taqsima 2.3 “Politiki tal-kontabilità). Fil-31 ta’ Diċembru 2023, din il-partita ammontat għal EUR 127,067 miljun (2023: EUR 125,378 miljun). Ir-remunerazzjoni ta’ dawn il-pretensjonijiet fl-2024 ġiet ikkalkulata fuq bażi ta’ kuljum bl-aktar rata tal-imgħax reċenti disponibbli tintuża mill-Eurosistema fis-sejħiet tagħha għall-offerti għall-operazzjonijiet ewlenin ta’ rifinanzjament (ara n-nota 24.2 “Introjtu mill-imgħax li jirriżulta mill-pretensjonijiet relatati mal-allokazzjoni ta’ karti tal-flus tal-euro fi ħdan l-Eurosistema” u n-nota 34 “Bidla fir-rata tal-imgħax użata għar-remunerazzjonita’ bilanċi fi ħdan l-Eurosistema”).

Nota 6 - Assi oħra

Nota 6.1 - Assi fissi tanġibbli u intanġibbli

Din il-partita tinkludi dan li ġej:

Fi tmiem is-sena, sar test tal-indeboliment fuq il-bini ewlieni tal-BĊE u fuq il-bini tal-uffiċċji bid-dritt tal-użu u ma ġie reġistrat ebda telf minħabba indeboliment.

Nota 6.2 - Assi finanzjarji oħra

Din il-partita tikkonsisti prinċipalment mill-portafoll tal-fondi proprji tal-BĊE, li fil-biċċa l-kbira jikkonsisti minn investimenti tal-kapital imħallas tal-BĊE kif ukoll minn ammonti mwarrba fil-fond tar-riżervi ġenerali u fil-provvediment kontra r-riskji finanzjarji. Din tinkludi wkoll 3,211-il sehem fil-Bank għall-Ħlasijiet Internazzjonali (BIS, Bank for International Settlements) bil-kost tal-akkwist ta’ EUR 42 miljun u kontijiet kurrenti oħrajn denominati f’euro.

Il-komponenti ta’ din il-partita kienu kif ġej:

Iż-żieda netta f’din il-partita fl-2024 kienet dovuta primarjament għall-investiment mill-ġdid tal-introjtu mill-imgħax iġġenerat mill-portafoll tal-fondi proprji.

Nota 6.3 - Differenzi fir-rivalwazzjoni ta’ strumenti barra mill-karta tal-bilanċ

Din il-partita tikkonsisti f’bidliet fil-valwazzjoni tat-tranżazzjonijiet swap u forward f’munita barranija li kienu pendenti fil-31 ta’ Diċembru 2024 (ara n-nota 21 “Tranżazzjonijiet swap u forward tal-kambju barrani”). Dawn il-bidliet fil-valwazzjoni ammontaw għal EUR 681 miljun (2023: EUR 552 miljun). Huma r-riżultat tat-traduzzjoni ta’ tranżazzjonijiet simili fl-ekwivalenti tagħhom f’euro bir-rati tal-kambju tad-data tal-karta tal-bilanċ, imqabblin mal-valuri f’euro li jirriżultaw mit-traduzzjoni tat-tranżazzjonijiet bil-kost medju tal-munita barranija rispettiva f’dik id-data (ara “Strumenti esklużi mill-karta tal-bilanċ” u “Assi u obbligazzjonijiet f’deheb u f’munita barranija” fit-Taqsima 2.3, “Politika tal-kontabilità”).

Nota 6.4 - Dovuti u spejjeż imħallsin bil-quddiem

Din il-partita tinkludi dan li ġej:

Fil-31 ta’ Diċembru 2024 din il-partita kienet tinkludi imgħax akkumulat riċevibbli fuq bilanċi TARGET dovuti minn BĊNi taż-żona tal-euro għal Diċembru 2024 (ara n-nota 12.2 “Obbligazzjonijiet relatati ma’ TARGET (netti)”) u imgħax akkumulat riċevibbli mingħand BĊNi taż-żona tal-euro għall-aħħar trimestru tal-2023 fir-rigward tal-pretensjonijiet tal-BĊE relatati mal-allokazzjoni ta’ karti tal-flus tal-euro fi ħdan l-Eurosistema (ara n-nota 5.1 “Pretensjonijiet relatati mal-allokazzjoni ta’ karti tal-flus tal-euro fi ħdan l-Eurosistema”). Dawn l-ammonti tħallsu f’Jannar 2025.

Din kienet tinkludi wkoll imgħax minn kupuni akkumulat fuq titoli, inkluż imgħax pendenti mħallas mal-akkwist (ara n-nota 2.2 “Bilanċi ma’ banek u investimenti f’titoli, self estern u assi esterni oħra”; u “Pretensjonijiet ma’ residenti taż-żona tal-euro denominati f’muniti barranin”, in-nota 4 “Titoli ta’ residenti taż-żona tal-euro denominati fl-euro” u n-nota 6.2 “Assi finanzjarji oħra”).

L-introjtu akkumulat relatat mal-kompiti superviżorji jikkorrispondi mat-tariffi superviżorji li għandhom jiġu riċevuti għall-perjodu tariffarju 2024 li se jinġabru fl-2025 (ara n-nota 27 “Introjtu/spejjeż netti mit-tariffi u l-kummissjonijiet”).^[53]

Il-bqija ta’ din il-partita kienet tikkonsisti prinċipalment minn (i) introjtu dovut minn proġetti u servizzi tas-SEBĊ li kienu qed jitħaddmu (ara n-nota 29 “Introjtu ieħor”); (ii) introjtu mill-imgħax akkumulat fuq strumenti finanzjarji oħrajn; u (iii) prepagamenti mixxellanji.

Nota 6.5 - Varji

Fil-31 ta’ Diċembru 2024, din il-partita ammontat għal EUR 53 miljun (2023: EUR 88 miljun) u kienet tinkludi prinċipalment bilanċi b’valur ta’ EUR 24 miljun (2023: EUR 28 million) relatati ma’ tranżazzjonijiet swap u forward f’muniti barranin li kienu pendenti fil-31 ta’ Diċembru 2024 (ara n-nota 21, “Tranżazzjonijiet swap u forward tal-kambju barrani”). Dawn il-bilanċi ħarġu mit-traduzzjoni ta’ tranżazzjonijiet simili fl-ekwivalenti f’euro bil-kost medju tal-munita rispettiva fid-data tal-karta tal-bilanċ; imqabbel mal-valuri f’euro li bihom it-tranżazzjonijiet daħlu fil-kontijiet għall-ewwel darba (ara “Strumenti esklużi mill-karta tal-bilanċ” fit-Taqsima 2.3 “Politika tal-kontabilità”).

Inkludiet ukoll riċevibbli fir-rigward ta’ proġetti u servizzi tas-SEBĊ operattivi (ara n-nota 29 “Introjtu ieħor”) u bilanċi fir-rigward ta’ taxxa fuq il-valur miżjud li tista’ tiġi rkuprata.

Nota 7 - Karti tal-flus fiċ-ċirkolazzjoni

Din il-partita tikkonsisti mis-sehem tal-BĊE (8%) mit-total tal-karti tal-flus tal-euro fiċ-ċirkolazzjoni (ara “Karti tal-flus fiċ-ċirkolazzjoni” fit-Taqsima 2.3 “Politiki tal-kontabilità”), li fil-31 ta’ Diċembru 2024 ammontat għal EUR 127,067 miljun (2023: EUR 125,378 miljun).

Nota 8 – Obbligazzjonijiet oħra ma’ istituzzjonijiet ta’ kreditu taż-żona tal-euro denominati f’euro

Il-banek ċentrali tal-Eurosistema għandhom il-possibbiltà li jaċċettaw flus kontanti bħala kollateral fil-faċilitajiet tagħhom ta’ self ta’ titoli fil-PSPP u s-settur pubbliku PEPP, bla ma jkollhom jerġgħu jinvestuhom. Fil-każ tal-BĊE, dawn l-operazzjonijiet isiru permezz ta’ istituzzjoni speċjalizzata.

Fil-31 ta’ Diċembru 2024, il-bilanċi li jirriżultaw minn tranżazzjonijiet ta’ self pendenti bħal dawn imwettqa minn istituzzjonijiet ta’ kreditu taż-żona tal-euro ammontaw għal EUR 2,388 miljun (2023: EUR 4,699 miljun). Il-flus kontanti riċevuti bħala kollateral ġew ittrasferiti lill-kontijiet ta’ TARGET u peress li baqgħu mhux investiti fi tmiem is-sena, dawn it-tranżazzjonijiet ġew irreġistrati fil-karta tal-bilanċ (ara “Tranżazzjonijiet inversi” fit-Taqsima 2.3 “Politiki kontabilistiċi” u n-nota 18 “Programmi ta’ self ta’ titoli”).^[54]

Nota 9 - Obbligazzjonijiet lejn residenti oħra taż-żona tal-euro denominati f’euro

Nota 9.1 - Amministrazzjoni pubblika

Fil-31 ta’ Diċembru 2024, din il-partita kienet tikkonsisti minn depożiti tal-Faċilità Ewropea ta’ Stabbiltà Finanzjarja (EFSF) li ammontaw għal EUR 73 miljun (2023: EUR 143 miljun). Fi tmiem l-2023 kienet tinkludi wkoll depożiti tal-Mekkaniżmu Ewropew ta’ Stabbiltà (MES). Skont l-Artikolu 21 tal-Istatut tas-SEBC, il-BĊE jista’ jaġixxi bħala aġent fiskali għal istituzzjonijiet, korpi, uffiċċji jew aġenziji tal-Unjoni, gvernijiet ċentrali, reġjonali, lokali jew awtoritajiet pubbliċi oħra, korpi oħra regolati bil-liġi pubblika, jew intrapriżi pubbliċi ta’ Stati Membri.

Nota 9.2 – Obbligazzjonijiet oħrajn

Din il-partita tikkonsisti f’bilanċi tas-sistemi anċillari taż-żona tal-euro^[55] konnessi ma’ TARGET permezz tal-komponent TARGET-BĊE. Fil-31 ta’ Diċembru 2024 kienet tammonta għal EUR 24,482 miljun (2023: EUR 20,479 miljun).

Nota 10 - Obbligazzjonijiet lejn persuni mhux residenti fiż-żona tal-euro denominati f’euro

Din il-partita tinkludi dan li ġej:

Fil-31 ta’ Diċembru 2024, l-akbar komponent ta’ din il-partita kien depożiti aċċettati mill-BĊE fir-rwol tiegħu bħala aġent fiskali għall-Kummissjoni Ewropea, relatati mal-amministrazzjoni ta’ attivitajiet ta’ għoti u teħid b’self tal-UE (ara n-nota 22 “Amministrazzjoni ta’ operazzjonijiet ta’ għoti u teħid b’self”).

Din il-partita inkludiet bilanċi ta’ TARGET, li kienu jikkonsistu f’bilanċi ta’ BĊNi mhux taż-żona tal-euro meta mqabbla mal-BĊE (ara “Bilanċi Intra-SEBĊ/bilanċi intra-Eurosistema” fit-Taqsima 2.3 “Politiki tal-kontabilità”) u bilanċi tas-sistemi anċillari mhux taż-żona tal-euro konnessi ma’ TARGET permezz tal-komponent TARGET-BĊE.

Barra minn hekk, dan inkluda bilanċi li jirriżultaw minn tranżazzjonijiet ta’ self ta’ titoli tal-PEPP pendenti u PSPP fis-settur pubbliku mwettqa ma’ istituzzjonijiet ta’ kreditu mhux fiż-żona tal-euro. Il-flus kontanti riċevuti bħala kollateral ġew ittrasferiti lill-kontijiet ta’ TARGET u peress li baqgħu mhux investiti fi tmiem is-sena, dawn it-tranżazzjonijiet ġew irreġistrati fil-karta tal-bilanċ (ara “Tranżazzjonijiet inversi” fit-Taqsima 2.3 “Politiki kontabilistiċi” u n-nota 18 “Programmi ta’ self ta’ titoli”).

Il-bqija ta’ din il-partita kkonsistiet f’bilanċ li jirriżulta mill-arranġament permanenti reċiproku dwar il-muniti mal-Federal Reserve System. B’dan l-arranġament, il-Federal Reserve Bank of New York jipprovdi dollari Amerikani lill-BĊE permezz ta’ tranżazzjonijiet swap biex jiġi pprovdut finanzjament f’dollari Amerikani għal żmien qasir lil kontropartijiet tal-Eurosistema. Simultanjament, il-BĊE jagħmel tranżazzjonijiet swap back-to-back mal-BĊNi taż-żona tal-euro, li jużaw dawn il-fondi biex iwettqu operazzjonijiet għall-provvista ta’ likwidità f’dollari Amerikani ma’ kontropartijiet fl-Eurosistema bħala tranżazzjonijiet riversjati. It-tranżazzjonijiet swap back-to-back jirriżultaw f’bilanċi fi ħdan l-Eurosistema bejn il-BĊE u l-BĊNi taż-żona tal-euro. Barra minn hekk, it-tranżazzjonijiet swap li jsiru mill-BĊE mal-Federal Reserve Bank of New York u l-BĊNi taż-żona tal-euro joħolqu pretensjonijiet u obbligazzjonijiet forward li jiġu rreġistrati fil-kontijiet esklużi mill-karta tal-bilanċ (ara n-nota 21 “Tranżazzjonijiet swap u forward tal-kambju barrani”).

Nota 11 - Obbligazzjonijiet lejn persuni mhux residenti fiż-żona tal-euro denominati f’muniti barranin

Nota 11.1 Depożiti, bilanċi u obbligazzjonijiet oħra

Fil-31 ta’ Diċembru 2024, ma kien hemm l-ebda bilanċ taħt din il-partita, filwaqt li fi tmiem l-2023, din kienet tikkonsisti f’obbligazzjoni f’munita barranija fil-konfront ta’ persuni mhux residenti fiż-żona tal-euro li kienet tammonta għal EUR 24 miljun, li rriżultat fil-kuntest tal-ġestjoni tar-riżervi barranin tal-BĊE.

Nota 12 – Obbligazzjonijiet intra-Eurosistema

Nota 12.1 – Obbligazzjonijiet ekwivalenti għat-trasferiment ta’ riżervi barranin

Dawn huma l-obbligazzjonijiet lejn il-BĊNi taż-żona tal-euro li jirriżultaw mit-trasferiment ta’ assi f’riżervi barranin lill-BĊE meta dawk il-BĊNi issieħbu fl-Eurosistema. Skont l-Artikolu 30.2 tal-Istatut tas-SEBĊ, dawn il-kontribuzzjonijiet huma fissi fi proporzjon tal-ishma tal-BĊNi fil-kapital sottoskritt tal-BĊE.

L-aġġustament ta’ kull ħames snin tal-ponderazzjonijiet tal-BĊNi fl-iskema għas-sottoskrizzjoni tal-kapital tal-BĊE fl-1 ta’ Jannar 2024 irriżulta fi tnaqqis fil-ponderazzjoni tal-BĊNi taż-żona tal-euro fil-kapital sottoskritt tal-BĊE (ara n-nota 16 “Kapital u riżervi”). Dan wassal għal tnaqqis ta’ EUR 109 miljun f’dawn l-obbligazzjonijiet fl-1 ta’ Jannar 2024, li tħallas lura lill-BĊNi taż-żona tal-euro bix-xieraq.

Ir-remunerazzjoni ta’ dawn l-obbligazzjonijiet fl-2024 ġiet ikkalkulata fuq bażi ta’ kuljum bl-aħħar rata tal-imgħax disponibbli użata mill-Eurosistema fis-sejħiet tagħha għall-offerti għall-operazzjonijiet ewlenin ta’ rifinanzjament, aġġustata biex tirrifletti redditu ta’ żero mill-komponent tad-deheb (ara n-nota 24.3 “Remunerazzjoni ta’ pretensjonijiet tal-BĊNi fir-rigward tar-riżervi barranin trasferiti” u n-nota 34 “Bidla fir-rata tal-imgħax użata għar-remunerazzjoni ta’ bilanċi intra-Eurosistema”).

Nota 12.2 – Obbligazzjonijiet relatati ma’ TARGET (netti)

Din il-partita tikkonsisti l-aktar mill-bilanċi ta’ TARGET tal-BĊNi taż-żona tal-euro fir-rigward tal-BĊE (ara “Bilanċi intra-SEBĊ/bilanċi intra-Eurosistema” fit-Taqsima 2.3 “Politiki tal-kontabilità).

It-tnaqqis fl-obbligazzjoni netta ta’ TARGET kien prinċipalment attribwibbli għall-influssi tal-flus bħala riżultat ta’ (i) il-maturità tat-titoli taħt l-APP u l-PEPP, li ġew saldati permezz tal-kontijiet ta’ TARGET u ġew ikkumpensati biss parzjalment mir-riinvestimenti taħt il-PEPP (ara n-nota 4 “Titoli ta’ residenti taż-żona tal-euro denominati f’euro”) u (ii) depożiti ogħla aċċettati mill-BĊE fir-rwol tiegħu bħala aġent fiskali għall-Kummissjoni Ewropea, relatati mal-amministrazzjoni tal-attivitajiet ta’ għoti u teħid b’self tal-UE (ara n-nota 10 “Obbligazzjonijiet għal residenti mhux fiż-żona tal-euro denominati f’euro”). L-impatt ta’ dawn il-fatturi kien parzjalment ikkumpensat, prinċipalment mill-ħruġ ta’ flus li jirriżulta mill-ispiża tal-imgħax imħallsa fuq l-obbligazzjoni netta ta’ TARGET tal-BĊE (ara n-nota 24.5 “Spiża tal-imgħax netta li tirriżulta mill-bilanċi ta’ TARGET dovuti minn/lill-BĊNi”).

Bl-eċċezzjoni ta’ bilanċi li jirriżultaw minn tranżazzjonijiet ta’ swaps dahar ma’ dahar b’rabta ma’ operazzjonijiet li jipprovdu likwidità f’dollaru Amerikan, ir-remunerazzjoni tal-pożizzjonijiet ta’ TARGET miżmuma mill-BĊNi taż-żona tal-euro vis-à-vis il-BĊE fl-2024 ġiet ikkalkolata fuq bażi ta’ kuljum l-aktar tard bir-rata tal-imgħax disponibbli użata mill-Eurosistema fis-sejħiet għall-offerti tagħha għal operazzjonijiet ta’ rifinanzjament ewlenin (ara n-nota 24.5 “Spiża tal-imgħax netta li tirriżulta mill-bilanċi ta’ TARGET dovuti minn/lill-BĊNi” u n-nota 34 “Bidla fir-rata tal-imgħax użata għar-remunerazzjoni tal-bilanċi intra-Eurosistema”).

Nota 12.3 - Obbligazzjonijiet oħra fi ħdan l-Eurosistema (netti)

Fil-31 ta’ Diċembru 2024, din il-partita ammontat għal EUR 40 miljun (2023: EUR 40 miljun). Kienet tikkonsisti prinċipalment f’depożiti aċċettati mill-BĊE fir-rwol tiegħu bħala aġent fiskali għall-Kummissjoni Ewropea, relatati mal-amministrazzjoni ta’ attivitajiet ta’ għoti u teħid b’self tal-UE (ara n-nota 22 “Amministrazzjoni ta’ operazzjonijiet ta’ għoti u teħid b’self”).

Nota 13 – Obbligazzjonijiet oħrajn

Nota 13.1 - Differenzi fir-rivalwazzjoni ta’ strumenti barra mill-karta tal-bilanċ

Sal-31 ta’ Diċembru 2024 ma kien hemm l-ebda bilanċ taħt din il-partita. Fi tmiem l-2023, din il-partita kienet tikkonsisti primarjament minn bidliet fil-valwazzjoni tat-tranżazzjonijiet swap u forward f’munita barranija li kienu pendenti fi tmiem is-sena (ara n-nota 21 “Tranżazzjonijiet swap u forward tal-kambju barrani”). Dawn il-bidliet fil-valwazzjoni ammontaw għal EUR 68 miljun. Huma r-riżultat tat-traduzzjoni ta’ tranżazzjonijiet simili fl-ekwivalenti tagħhom f’euro bir-rati tal-kambju tad-data tal-karta tal-bilanċ, imqabblin mal-valuri f’euro li jirriżultaw mit-traduzzjoni tat-tranżazzjonijiet bil-kost medju tal-munita barranija rispettiva f’dik id-data (ara “Strumenti esklużi mill-karta tal-bilanċ” u “Assi u obbligazzjonijiet f’deheb u f’munita barranija” fit-Taqsima 2.3, “Politika tal-kontabilità”).

Nota 13.2 – Dovuti u introjtu miġbura bil-quddiem

Din il-partita tinkludi dan li ġej:

Fil-31 ta’ Diċembru 2024, iż-żewġ komponenti ewlenin taħt din il-partita kienu imgħax akkumulat pagabbli fuq il-bilanċi ta’ TARGET dovuti lill-BĊNi għal Diċembru 2024 (ara n-nota 10 “Obbligazzjonijiet lejn persuni mhux residenti fiż-żona tal-euro denominati f’euro” u n-nota 12.2 “Obbligazzjonijiet relatati ma’ TARGET (netti)”) u imgħax akkumulat pagabbli lill-BĊNi taż-żona tal-euro għall-2024 fir-rigward tal-pretensjonijiet tagħhom relatati mar-riżervi barranin trasferiti lill-BĊE (ara n-nota 12.1 “Obbligazzjonijiet ekwivalenti għat-trasferiment ta’ riżervi barranin”). Dawn l-ammonti tħallsu f’Jannar 2025.

Din il-partita kienet tinkludi wkoll imgħax akkumulat pagabbli fuq depożiti aċċettati mill-BĊE fir-rwol tiegħu bħala aġent fiskali (ara n-nota 9.1 “Gvern ġenerali”, in-nota 10 “Obbligazzjonijiet lejn persuni mhux residenti fiż-żona tal-euro denominati f’euro” u n-nota 12.3 “Obbligazzjonijiet oħrajn fi ħdan l-Eurosistema (netti)”).

Il-bqija ta’ din il-partita kienet tinkludi prinċipalment (i) imgħax akkumulat pagabbli fuq bilanċi tas-sistemi anċillari taż-żona tal-euro konnessi ma’ TARGET permezz tal-komponent TARGET-BĊE (ara n-nota 9.2 “Passiv ieħor”), (ii) akkumulazzjonijiet mixxellanji u introjtu differit;

Nota 13.3 - Varji

Fil-31 ta’ Diċembru 2024, din il-partita ammontat għal EUR 1,327 miljun (2023: EUR 1,401 miljun). It-total inkluda bilanċi li ammontaw għal EUR 574 miljun (2023: EUR 635 miljun) relatati ma’ tranżazzjonijiet swap u forward f’muniti barranin li kienu pendenti fil-31 ta’ Diċembru 2024 (ara n-nota 21, “Tranżazzjonijiet swap u forward tal-kambju barrani”). Dawn il-bilanċi ħarġu mit-traduzzjoni ta’ tranżazzjonijiet simili fl-ekwivalenti f’euro bil-kost medju tal-munita rispettiva fid-data tal-karta tal-bilanċ; imqabbla mal-valuri f’euro li bihom it-tranżazzjonijiet daħlu fil-kontijiet għall-ewwel darba (ara “Strumenti esklużi mill-karta tal-bilanċ” fit-Taqsima 2.3 “Politika tal-kontabilità”).

Din il-partita kienet tinkludi wkoll obbligazzjoni ta’ kiri ta’ EUR 110 miljun (2023: EUR 117 miljun) (ara “Kirjiet” fit-Taqsima 2.3 “Politika tal-kontabilità”).

Barra minn hekk, din il-partita inkludiet l-obbligazzjoni netta tal-benefiċċji definiti tal-BĊE fir-rigward tal-benefiċċji ta’ wara l-impjieg u benefiċċji oħra fit-tul tal-persunal tiegħu,^[56] il-membri tal-Bord Eżekuttiv, u l-membri tal-Bord Superviżorju impjegati mill-BĊE.

Il-benefiċċji tal-BĊE ta’ wara l-impjieg u benefiċċji oħra fit-tul

Karta tal-bilanċ
L-ammonti rikonoxxuti taħt “Varji” (obbligazzjonijiet) fil-karta tal-bilanċ fir-rigward ta’ benefiċċji ta’ wara l-impjieg u benefiċċji oħra fit-tul kienu kif ġej:

Il-valur attwali tal-obbligu tal-benefiċċji vis-à-vis il-persunal, ta’ EUR 2,712 miljun fl-2024 (2023: EUR 2,458 miljun) kien jinkludi benefiċċji mhux finanzjati ta’ EUR 293 miljun (2023: EUR 278 miljun) relatati mal-benefiċċji ta’ wara l-impjieg, barra l-pensjonijiet, u ma’ benefiċċji oħra fit-tul. Il-valur preżenti tal-obbligu tal-benefiċċji vis-à-vis l-membri tal-Bord Eżekuttiv u l-membri tal-Bord Superviżorju, ta’ EUR 37 miljun (2023: EUR 35 miljun) hu relatat biss ma’ provvedimenti mhux finanzjati li jeżistu għall-benefiċċji ta’ wara l-impjieg u benefiċċji oħra fit-tul.

Il-kalkolu mill-ġdid tal-obbligazzjoni netta tal-benefiċċji definiti tal-BĊE fir-rigward tal-benefiċċji ta’ wara l-impjieg huma rikonoxxuti fil-karta tal-bilanċ taħt “Kontijiet ta’ rivalwazzjoni”. Fl-2024, il-gwadanni mill-kalkolu mill-ġdid taħt dik il-partita ammontaw għal €416-il miljun (2023: EUR 238 miljun (ara n-nota 15 “Kontijiet ta’ rivalwazzjoni”).

Bidliet fl-obbligu tal-benefiċċji definiti, assi tal-iskema u riżultati tal-kejl mill-ġdid
Il-bidliet fil-valur attwali tal-obbligu tal-benefiċċji definiti jidher hawn taħt:

Il-kost tas-servizz tal-passat fl-2024 kien relatat mal-kontributuri u mal-pensjonanti attwali u rriżulta minn emenda għar-regoli li jirregolaw il-pjanijiet tal-pensjoni tal-BĊE fl-2024, skont liema, iż-żieda annwali tal-pensjonijiet tallinja mal-aġġustamenti ġenerali annwali tas-salarji għall-impjegati tal-BĊE mill-2026.

Il-gwadanni mill-kalkolu mill-ġdid fuq l-obbligu tal-benefiċċju definit fl-2024 irriżultaw prinċipalment bħala riżultat taż-żieda fir-rata ta’ skont użata għall-valutazzjoni attwarja minn 3.4 % fl-2023 għal 3.6 % fl-2024 u l-bidla tas-suppożizzjonijiet demografiċi.

Il-bidliet fil-valur ġust tal-assi tal-iskema fl-istruttura tal-benefiċċji definiti fir-rigward tal-persunal jidhru hawn taħt:

Il-gwadanni bil-kalkolu mill-ġdid fuq l-assi tal-iskema fl-2024 jirriflettu l-fatt li r-redditu attwali mill-unitajiet tal-fondi kien ogħla mill-introjtu mill-imgħax assunt fuq l-assi tal-iskema, li kien ibbażat fuq is-suppożizzjoni ta’ rata ta’ skont ta’ 3.4%.

Il-bidliet fir-riżultati tal-kejl mill-ġdid kienu kif ġej:

Kont tal-profitt u t-telf
L-ammonti rikonoxxuti fil-kont tal-profitt u t-telf kienu kif ġej:

L-ammonti rikonoxxuti fil-kont tal-profitt u t-telf għall-kost tas-servizz kurrenti, il-kost tal-imgħax fuq l-obbligu u l-introjtu mill-imgħax fuq l-assi tal-pjan huma stmati bl-użu tar-rati li kienu applikabbli fis-sena preċedenti. Ir-rata ta’ skont użata għall-valwazzjoni attwarja naqset minn 3.9 % fl-2022 għal 3.4 % fl-2023, u fl-2024 irriżultat f’kost ogħla tas-servizz attwali. Il-kost tal-imgħax fuq l-obbligu u l-introjtu mill-imgħax fuq l-assi tal-pjan żdied ukoll minħabba bilanċi ogħla li jikkumpensaw l-impatt tar-rata ta’ skont aktar baxxa użata.

Il-kost tas-servizz tal-passat li jirriżulta mill-emenda tar-regoli li jirregolaw il-pjanijiet tal-pensjoni tal-BĊE fl-2024 ġie rikonoxxut bis-sħiħ fil-kont tal-profitt u telf għas-sena li fiha ttieħdet id-deċiżjoni ta’ emenda.

Suppożizzjonijiet ewlenin
Fit-tħejjija tal-valwazzjonijiet imsemmijin f’din in-nota, l-attwarji indipendenti użaw suppożizzjonijiet li ġew aċċettati mill-Bord Eżekuttiv għall-għanijiet tal-kontabilità u l-pubblikazzjoni. Is-suppożizzjonijiet ewlenin użati għal skopijiet ta’ kalkolu tal-obbligu tal-benefiċċji ta’ wara l-impjieg u benefiċċji oħra fit-tul kienu kif ġej:

Nota 14 - Provvedimenti

Nota 14.1 - Provvedimenti oħra

Fil-31 ta’ Diċembru 2024, din il-partita inkludiet provvedimenti amministrattivi li jammontaw għal EUR 72 miljun (2023: EUR 67 miljun).

Nota 15 - Kontijiet ta’ rivalwazzjoni

Din il-partita tikkonsisti l-aktar f’bilanċi ta’ rivalwazzjoni mill-gwadanni mhux realizzati fuq assi, obbligazzjonijiet u strumenti esklużi mill-karta tal-bilanċ (ara “Assi u obbligazzjonijiet f’deheb u f’munita barranija”, “Titoli”, “Rikonoxximent tal-introjtu”, u “Strumenti esklużi mill-karta tal-bilanċ” fit-Taqsima 2.3 “Politiki tal-kontabilità”). Il-partita tinkludi wkoll il-kalkoli l-ġodda tal-obbligazzjoni netta tal-benefiċċji definiti tal-BĊE fir-rigward tal-benefiċċji ta’ wara l-impjieg (ara “Il-benefiċċji ta’ wara l-impjieg tal-BĊE u benefiċċji oħra fit-tul” fit-Taqsima 2.3 “Politiki tal-kontabilità” u n-nota 13.3 “Varji”).

Il-kontijiet ta’ rivalwazzjoni żdiedu fit-2024, l-aktar minħabba ż-żieda fil-prezz tas-suq tad-deheb f’termini ta’ euro. Il-kontijiet tar-rivalwazzjoni relatati mal-munita barranija żdiedu wkoll, prinċipalment minħabba l-apprezzament tad-dollaru Amerikan meta mqabbel mal-euro.

Ir-rati tal-kambju barrani użati għar-rivalwazzjoni tal-aħħar tas-sena kienu kif ġej:

Nota 16 - Kapital u riżervi

Nota 16.1 - Kapital

Bidla fl-iskema tal-kapital tal-BĊE
Skont l-Artikolu 29 tal-Istatut tas-SEBĊ, il-ponderazzjonijiet assenjati lill-BĊNi fl-iskema għas-sottoskrizzjoni għall-kapital tal-BĊE jiġu aġġustati kull ħames snin.^[57] Il-ħames aġġustament ta’ dan it-tip minn meta twaqqaf il-BĊE sar fl-1 ta’ Jannar 2024.

Kapital imħallas tal-BĊE
Il-kapital imħallas tal-BĊE naqas b’EUR 23 miljun fl-1 ta’ Jannar 2024. Dan huwa dovut għat-tnaqqis ġenerali ta’ 0.2200 punt perċentwali fil-ponderazzjoni tal-BĊNi taż-żona tal-euro (b’sottoskrizzjonijiet imħallsa kompletament) fil-kapital sottoskritt tal-BĊE ta’ EUR 10,825 miljun, u ż-żieda ekwivalenti f’dak tal-BĊNi mhux taż-żona tal-euro (li jħallsu biss 3.75% tas-sottoskrizzjonijiet tagħhom).

It-tabella li ġejja turi l-bidliet fl-iskema tal-kapital, il-kapital sottoskritt u l-kapital imħallas:

Il-BĊNi taż-żona tal-euro ħallsu b’mod sħiħ is-sehem tagħhom fil-kapital sottoskritt.

Il-BĊNi barra ż-żona tal-euro huma mitlubin iħallsu 3.75% tal-kapital sottoskritt tagħhom bħala kontribuzzjoni għall-kostijiet operattivi tal-BĊE. Il-BĊNi barra ż-żona tal-euro ma huma intitolati jirċievu ebda sehem mill-profitti distribwibbli tal-BĊE, u lanqas ma huma responsabbli biex ikopru kwalunkwe telf li jġarrab il-BĊE.

Nota 17 – Telf akkumulat riportat

Fil-31 ta’ Diċembru 2024, din il-partita ammontat għal EUR 1,266 miljun (2023: żero). Dan kien jinkludi t-telf tal-BĊE għas-sena 2023, li, wara deċiżjoni tal-Kunsill Governattiv, ġie ttrasferit fuq il-karta tal-bilanċ tal-BĊE sabiex jiġi paċut mill-profitti futuri.

2.5 Strumenti barra l-karta tal-bilanċ

Nota 18 - Programmi ta’ self ta’ titoli

Bħala parti mill-ġestjoni tal-fondi proprji tal-BĊE, il-BĊE għandu ftehim dwar programm ta’ self ta’ titoli li bih istituzzjoni speċjalizzata tagħmel tranżazzjonijiet ta’ self ta’ titoli f’isem il-BĊE. Skont id-deċiżjonijiet tal-Kunsill Governattiv, il-BĊE għamel disponibbli wkoll titoli miżmuma għal skopijiet ta’ politika monetarja għas-self.^[58]

Skont il-kollateral riċevut, l-operazzjonijiet ta’ self ta’ titoli jiġu rreġistrati f’(i) kontijiet li ma jidhrux fil-karta tal-bilanċ meta mwettqa kontra kollateral ta’ titoli, u (ii) kontijiet fil-karta tal-bilanċ meta mwettqa kontra flus kontanti li jibqgħu mhux investiti fl-aħħar tas-sena (ara n-nota 8 “Obbligazzjonijiet oħra lill-istituzzjonijiet ta’ kreditu taż-żona tal-euro denominati f’euro” u n-nota 10 “Obbligazzjonijiet għal residenti mhux fiż-żona tal-euro denominati f’euro”).

Il-valur tas-suq tat-titoli mislufa u l-kollateral korrispondenti kien kif ġej:

Nota 19 - Futures tar-rati tal-imgħax

It-tranżazzjonijiet li ġejjin, tradotti bir-rati tal-kambju tal-aħħar tas-sena, kienu għadhom pendenti fi tmiem is-sena:

Dawn it-tranżazzjonijiet saru fil-kuntest tal-ġestjoni tar-riżervi barranin tal-BĊE.

Nota 20 - Tranżazzjonijiet forward f’titoli

Fil-31 ta’ Diċembru 2024, ma kienx hemm tranżazzjonijiet bil-quddiem f’titoli pendenti. Fi tmiem l-2023, b’kuntrast għal dan, ix-xiri bil-quddiem u l-bejgħ ta’ titoli, kull wieħed fl-ammont ta’ EUR 45 miljun, tradotti bir-rati tal-kambju ta’ tmiem is-sena, baqgħu pendenti:

Dawn it-tranżazzjonijiet saru fil-kuntest tal-ġestjoni tar-riżervi barranin tal-BĊE.

Nota 21 - Tranżazzjonijiet swap u forward tal-kambju barrani

Ġestjoni ta’ riżervi barranin
Saru tranżazzjonijiet swap u forward tal-kambju barrani fil-kuntest tal-ġestjoni tar-riżervi barranin tal-BĊE. Il-pretensjonijiet u l-obbligazzjonijiet li ġejjin li jirriżultaw minn dawn it-tranżazzjonijiet, tradotti bir-rati tal-kambju barrani tal-aħħar tas-sena, kienu pendenti fi tmiem is-sena:

Arranġamenti swap li jipprovdu likwidità
Il-BĊE hu parti minn network ta’ swap-line ta’ banek ċentrali u għandu fis-seħħ arranġamenti reċiproċi ta’ swap mal-Bank of Canada, il-Bank of England, il-Bank of Japan, il-Federal Reserve System u l-Bank Nazzjonali Żvizzeru. Għandu wkoll linja swap reċiproka mal-Bank Popolari taċ-Ċina. Dawn l-arranġamenti swap jippermettu l-provvediment ta’ (i) likwidità fi kwalunkwe waħda mill-muniti rispettivi tal-banek ċentrali ta’ hawn fuq lill-banek taż-żona tal-euro jew (ii) likwidità f’euro lil istituzzjonijiet finanzjarji fil-ġurisdizzjonijiet tal-banek ċentrali msemmija hawn fuq. Barra minn hekk, hemm fis-seħħ ukoll ftehimiet ta’ swap ma’ Danmarks Nationalbank u Sveriges Riksbank għall-provvista ta’ likwidità f’euro lil istituzzjonijiet finanzjarji fil-ġurisdizzjonijiet tagħhom. L-arranġamenti ta’ hawn fuq għandhom l-għan li jtaffu t-tensjonijiet fis-swieq internazzjonali tal-finanzjament u li jimminimizzaw ir-riskji ta’ ċirkwiti ta’ feedback negattivi.^[59]

Pretensjonijiet u obbligazzjonijiet f’dollari Amerikani b’data ta’ maturità fl-2025 saru fir-rigward tal-provvediment ta’ likwidità f’dollari Amerikani lil kontropartijiet tal-Eurosistema (ara n-nota 10 “Obbligazzjonijiet lejn persuni mhux residenti fiż-żona tal-euro denominati f’euro”).

Nota 22 - Amministrazzjoni ta’ operazzjonijiet ta’ self u għoti ta’ self

Fl-2024, il-BĊE kompla jkun responsabbli għall-amministrazzjoni tal-kontijiet u għall-ipproċessar tal-pagamenti relatati mal-operazzjonijiet ta’ għoti u teħid b’self tal-UE taħt il-faċilità ta’ assistenza finanzjarja fuq terminu medju, il-Mekkaniżmu Ewropew ta’ Stabbilizzazzjoni Finanzjarja u l-ftehim dwar il-faċilità ta’ self għall-Greċja.

B’risposta għall-pandemija tal-COVID-19, l-UE tat self lill-Istati Membri taħt l-istrument tagħha għall-Appoġġ temporanju biex jittaffew ir-Riskji ta’ Qgħad f’Emerġenza (SURE). Id-disponibbiltà ta’ dan l-istrument intemmet fil-31 ta’ Diċembru 2022, iżda l-ħruġ rilevanti kien jikkonsisti f’bonds li jvarjaw minn maturità ta’ 5 snin sa 30 sena.

Fl-2024, l-UE kompliet ukoll tipprovdi finanzjament fil-forma ta’ appoġġ finanzjarju mhux ripagabbli u appoġġ ta’ self lill-Istati Membri fil-programm Next Generation EU (NGEU), li ġie stabbilit biex jappoġġa l-irkupru ekonomiku fl-UE, filwaqt li jiffaċilita t-tranżizzjoni ekoloġika u diġitali tal-ekonomija tal-Unjoni. Fl-2024, l-UE pprovdiet ukoll appoġġ kemm lill-Ukrajna, fil-forma ta’ self skont ir-Regolament il-ġdid dwar il-Faċilità għall-Ukrajna inkluż finanzjament tranżitorju eċċezzjonali, kif ukoll lir-Repubblika Għarbija tal-Eġittu fil-forma ta’ assistenza makrofinanzjarja fuq terminu qasir. Il-BĊE appoġġa lill-Kummissjoni Ewropea fl-amministrazzjoni tal-operazzjonijiet relatati ma’ dawn l-istrumenti.

Barra minn hekk, il-BĊE jaġixxi bħala aġent tal-ħlas għall-Kummissjoni Ewropea fir-rigward tas-Servizz ta’ Ħruġ tal-UE l-ġdid tiegħu, li tnieda f’Jannar 2024.

Fl-2024, il-BĊE pproċessa pagamenti relatati mal-operazzjonijiet kollha msemmija hawn fuq.

Nota 23- Obbligazzjonijiet kontinġenti minn kawżi pendenti

Tressqu kawżi kontra l-BĊE dwar l-eżerċizzju tal-funzjonijiet superviżorji tiegħu fuq Banca Carige S.p.A. (Banca Carige). Fi tnejn minn dawn il-kawżi, l-azzjonisti ta’ Banca Carige qed ifittxu kumpens finanzjarju mingħand il-BĊE għad-dannu allegatament imġarrab b’riżultat ta’ diversi azzjonijiet mill-BĊE fl-eżerċitar tal-funzjonijiet superviżorji tiegħu fir-rigward ta’ Banca Carige, li jikkonsistu kemm f’allegati nuqqasijiet ta’ azzjoni kif ukoll f’azzjonijiet dannużi. Il-BĊE rebaħ waħda minn dawn iż-żewġ kawżi fil-prim istanza; is-sentenza rilevanti tal-Qorti Ġenerali ġiet appellata mill-kontroparti u bħalissa tinsab pendenti quddiem il-Qorti tal-Ġustizzja. Il-kawża l-oħra għadha pendenti quddiem il-Qorti Ġenerali. Dawn il-kawżi se jiġu deċiżi filwaqt li jitqies, fost fatturi oħra, l-eżitu finali ta’ każijiet relatati oħrajn. F’waħda minn dawn, il-Qorti Ġenerali tal-UE qieset, fis-sentenza tagħha tat-12 ta’ Ottubru 2022, li d-deċiżjoni tal-BĊE li jqiegħed lil Banca Carige taħt amministrazzjoni temporanja ma kellhiex bażi legali xierqa skont il-liġi Taljana. Għaldaqstant, il-Qorti Ġenerali annullat id-deċiżjoni tal-BĊE li jqiegħed lil Banca Carige taħt amministrazzjoni temporanja kif ukoll l-ewwel estensjoni tat-tul tal-amministrazzjoni temporanja fl-2019. Madankollu, is-sentenza tal-Qorti Ġenerali ġiet appellata mill-BĊE quddiem il-Qorti tal-Ġustizzja tal-UE, li għad tista’ twaqqa’ din is-sentenza. Barra minn hekk, żewġ deċiżjonijiet oħra tal-BĊE li jestendu l-amministrazzjoni temporanja bħalissa qed jiġu kkontestati f’rikors għal annullament, li għadu pendenti.

2.6 Noti dwar il-kont tal-profitt u t-telf

Nota 2 – Introjtu nett mill-imgħax/(spiża)

Nota 24.1 — Introjtu nett mill-imgħax fuq riżervi barranin

L-introjtu nett mill-imgħax jew l-ispiża netta fuq ir-riżervi barranin tal-BĊE, imqassma skont it-tip ta’ strument, huma murija hawn taħt:

L-introjtu nett mill-imgħax jew l-ispiża netta fuq ir-riżervi barranin tal-BĊE, imqassma skont il-munita barranija, kienu kif ġej:

Nota 24.2 - Introjtu mill-imgħax li jirriżulta mill-pretensjonijiet relatati mal-allokazzjoni ta’ karti tal-flus tal-euro fi ħdan l-Eurosistema

Fl-2024, l-introjtu mill-imgħax relatat mas-sehem ta’ 8% tal-BĊE mill-valur totali ta’ karti tal-flus tal-euro fiċ-ċirkolazzjoni (ara “Karti tal-flus fiċ-ċirkolazzjoni” fit-Taqsima 2.3 “Politiki tal-kontabilità” u n-nota 5.1 “Pretensjonijiet relatati mal-allokazzjoni ta’ karti tal-flus tal-euro fl-Eurosistema”) ammonta għal EUR 5,232 miljun (2023: EUR 4,817-il miljun). Iż-żieda rriżultat mir-rata medja ogħla fuq l-operazzjonijiet ewlenin ta’ rifinanzjament meta mqabbla mas-sena ta’ qabel (2024: 4.1%, 2023: 3.8%).

Nota 24.3 – Remunerazzjoni ta’ pretensjonijiet ta’ BĊNi fir-rigward ta’ riżervi barranin trasferiti

Fl-2024, l-ispiża fuq ir-remunerazzjoni li rriżultat mill-pretensjonijiet tal-BĊNi taż-żona tal-euro fir-rigward tal-assi f’riżervi barranin trasferiti lill-BĊE (ara n-nota 12.1 “Obbligazzjonijiet ekwivalenti għat-trasferiment ta’ riżervi barranin”) ammontat għal EUR 1,448 miljun (2023: EUR 1,335 miljun). Iż-żieda rriżultat mir-rata medja ogħla fuq l-operazzjonijiet ewlenin ta’ rifinanzjament meta mqabbla mas-sena ta’ qabel (2024: 4.1%, 2023: 3.8%).

Nota 24.4 – Introjtu mill-imgħax nett fuq titoli miżmuma għall-għanijiet tal-politika monetarja

L-introjtu mill-imgħax nett fuq titoli miżmuma għal skopijiet ta’ politika monetarja kien kif ġej:

Nota 24.5 – Spiża netta tal-imgħax li tirriżulta mill-bilanċi ta’ TARGET dovuti lil/mill-BĊNi

L-introjtu mill-imgħax jew l-ispiża tal-imgħax li tirriżulta mill-bilanċi ta’ TARGET dovuti minn/lill-BĊNi kienu kif ġej:

Iż-żieda rriżultat prinċipalment mir-rata medja ogħla fuq l-operazzjonijiet ewlenin ta’ rifinanzjament meta mqabbla mas-sena ta’ qabel (2024: 4.1%, 2023: 3.8%).

Nota 25 - Gwadanni/(telf) realizzati minn operazzjonijiet finanzjarji

Il-gwadann u t-telf realizzat li jirriżulta minn operazzjonijiet finanzjarji kienu kif ġej:

It-telf nett realizzat mill-prezzijiet jinkludi gwadanni u telf realizzat fuq titoli u futures tar-rata tal-imgħax. It-telf nett realizzat fil-prezzijiet fl-2024 irriżulta prinċipalment mit-trattament kontabilistiku tal-primjum u l-amortizzazzjoni tal-iskont relatati mal-ħlasijiet lura ta’ titoli miżmuma fl-ABSPP.^[60] It-telf nett realizzat mill-prezzijiet kien parzjalment paċut minn gwadanni realizzati mir-rata tal-kambju netti, li fil-biċċa l-kbira rriżultaw bħala konsegwenza tat-tnaqqis fil-prezz tal-aħħar tas-sena ta’ għadd ta’ titoli f’dollari Amerikani.

It-tabella li ġejja turi l-gwadanni u t-telf realizzati li jirriżultaw minn operazzjonijiet finanzjarji, imqassma skont il-munita u t-trimestru:

Nota 26 – Tnaqqis tal-valur ta’ assi u pożizzjonijiet finanzjarji

It-tnaqqis tal-valur ta’ assi u pożizzjonijiet finanzjarji jidher hawn taħt:

Il-valur tas-suq ta’ għadd ta’ titoli, prinċipalment miżmuma fil-portafoll f’dollaru Amerikan, naqas flimkien ma’ żieda fir-redditi korrispondenti lejn tmiem l-2024. Dan wassal għal telf mhux realizzat mill-prezz fl-aħħar tas-sena.

It-telf mhux realizzat mir-rata tal-kambju rriżulta minħabba l-valwazzjoni negattiva tal-kost medju tal-akkwist tal-parteċipazzjoni tal-BĊE tal-yen Ġappuniż għar-rata tal-kambju ta’ tmiem is-sena 2024. Dan jirrifletti d-deprezzament tal-yen Ġappuniż meta mqabbel mal-euro minn meta sar ix-xiri.

Nota 27 – Introjtu nett/(spiża) netta minn tariffi u kummissjonijiet

Introjtu taħt din il-partita jikkonsisti primarjament minn tariffi superviżorji. L-ispejjeż jikkonsistu b’mod predominanti minn tariffi ta’ kustodja.

Introjtu u spejjeż relatati mal-kompiti superviżorji
Introjtu relatat mas-superviżjoni bankarja prinċipalment jinkludi introjtu mit-tariffi superviżorji. Il-BĊE jimponi tariffi annwali fuq entitajiet taħt superviżjoni biex jirkupra l-ispiża mġarrba fit-twettiq tal-kompiti superviżorji tiegħu. Abbażi tal-ispejjeż annwali attwali tal-BĊE mġarrba fit-twettiq tal-kompiti ta’ superviżjoni bankarji tiegħu, l-introjtu mit-tariffi superviżorji għall-2024 kien ta’ EUR 681 miljun (2023: EUR 654 miljun).

Biex jiġi ddeterminat l-ammont ta’ tariffi superviżorji li għandhom jiġu imposti, l-ispiża annwali attwali tiġi aġġustata għall-ammonti rimborżati lil/riċevuti mingħand banek individwali għal perjodi tariffarji preċedenti u aġġustamenti oħra, inkluż l-imgħax riċevut fuq ħlasijiet tard.^[61] Meta jitqies aġġustament li jikkorrispondi għall-imgħax riċevut fuq ħlasijiet tard kif ukoll rimborżi netti lil banek individwali għal perjodi tariffarji preċedenti, it-tariffi superviżorji annwali li għandhom jiġu imposti fuq l-entitajiet taħt superviżjoni għall-perjodu tariffarju 2024 jikkorrispondu għal ammont kważi ugwali tal-ispejjeż annwali attwali ta’ EUR 681 miljun^[62] (ara n-nota 6.4 “Dovuti u spejjeż imħallsa bil-quddiem”). It-tariffi superviżorji individwali se jiġu ffaturati fit-tieni trimestru tal-2025.^[63]

Il-BĊE hu intitolat ukoll li jimponi penali amministrattivi fuq entitajiet taħt superviżjoni għal nuqqas ta’ konformità mal-liġi bankarja tal-UE dwar rekwiżiti prudenzjali (inklużi d-deċiżjonijiet superviżorji tal-BĊE). L-introjtu relatat ma jitqiesx fil-kalkolu tat-tariffi superviżorji annwali, u lanqas ir-rimborżi ta’ tali penali jekk jiġu emendati jew annullati d-deċiżjonijiet ta’ sanzjoni preċedenti. Minflok, l-ammonti relatati jiġu rreġistrati fil-kont tal-profitt u t-telf tal-BĊE. Fl-2024, l-introjtu li jirriżulta minn penali fuq entitjiet taħt superviżjoni ammonta għal EUR 16-il miljun (2023: EUR 18-il miljun).

B’hekk, l-introjtu tal-BĊE għal kompiti superviżorji kien kif ġej:

L-ispejjeż relatati mas-superviżjoni bankarja jirriżultaw mis-superviżjoni diretta ta’ entitajiet sinifikanti, is-sorveljanza tas-superviżjoni ta’ entitajiet inqas sinifikanti u t-twettiq ta’ kompiti orizzontali u servizzi speċjalizzati. Dawn jikkonsistu mill-ispejjeż diretti tal-funzjoni superviżorja tal-BĊE u mill-ispejjeż rilevanti li jirriżultaw minn oqsma ta’ appoġġ meħtieġa biex jiġu sodisfati r-responsabbiltajiet superviżorji tal-BĊE, li jirriflettu s-servizzi tagħhom fir-rigward ta’ bini u faċilitajiet; riżorsi umani; teknoloġija tal-informatika (IT); legali, awditu u amministrazzjoni; komunikazzjoni u traduzzjoni; kif ukoll attivitajiet oħra.

L-ispejjeż attwali relatati mal-kompiti superviżorji tal-BĊE, li jiġu rkuprati permezz tat-tariffi superviżorji annwali għall-2024, ammontaw għal EUR 681 miljun (2023: EUR 654 miljun). Minbarra l-impatt tal-inflazzjoni, l-intensifikazzjoni tal-inizjattivi superviżorji, flimkien ma’ kostijiet ogħla assoċjati ma’ żviluppi kontinwi u titjib fis-sistemi tal-IT iddedikati għas-superviżjoni bankarja, ikkontribwew għaż-żieda ġenerali f’dawn l-ispejjeż.

Nota 28 - Introjtu minn ishma azzjonarji u interessi parteċipanti

Id-dividend ta’ EUR 1 miljun fl-2024 (2023: EUR 1 miljun) li daħal mill-ishma li l-BĊE għandu fil-BIS (ara n-nota 6.2 “Assi finanzjarji oħra”) jidher taħt din il-partita.

Nota 29 - Introjtu ieħor

Introjtu mixxellanju ieħor kien ta’ EUR 119-il miljun fl-2024 (2023: EUR 72 miljun). It-total irriżulta prinċipalment minn kontribuzzjonijiet tal-BĊNi parteċipanti għall-kostijiet imġarrba mill-BĊE b’rabta mal-proġetti u s-servizzi tas-SEBĊ li huma operattivi.

Nota 30 - Kostijiet fuq il-persunal

Il-kostijiet fuq il-persunal kienu kif ġej:

L-għadd medju ta’ impjegati fl-2024, espress bħala ekwivalenti full-time (FTEs)^[64], ammonta għal 4,297 (2023: 4,222), li minnhom 386 (2023: 380) kienu persunal maniġerjali.

Kostijiet ogħla għall-benefiċċji ta’ wara l-impjieg irriżultaw minn emenda għar-regoli li jirregolaw il-pjanijiet tal-pensjoni tal-BĊE fl-2024. Skont ir-regoli tal-kontabilità relevanti tal-BĊE għall-pensjonijiet, il-kost tas-servizz tal-passat li rriżulta minn din l-emenda ġie rikonoxxut b’mod sħiħ fil-kont tal-profitt u t-telf għall-2024 meta ttieħdet id-deċiżjoni (ara n-nota 13.3 “Varji”). Is-salarji u l-allowances żdiedu f’konformità man-numru medju ogħla ppjanat ta’ persunal impjegat mill-BĊE u l-aġġustamenti regolari tas-salarji.

Remunerazzjoni għall-Bordijiet Eżekuttiv u Superviżorju
Membri tal-Bord Eżekuttiv u l-membri tal-Bord Superviżorju impjegati mill-BĊE jirċievu salarju bażiku u benefiċċji għar-residenza. Fil-każ tal-President, tiġi pprovduta residenza minflok benefiċċju għal residenza. Membri tal-Bord Eżekuttiv u l-President tal-Bord Superviżorju jirċievu wkoll benefiċċju tar-rappreżentanza. Bla ħsara għall-Kundizzjonijiet tal-Impjieg tal-Persunal tal-Bank Ċentrali Ewropew, il-membri taż-żewġ bordijiet huma intitolati għal benefiċċji tal-familja, tat-tfal u tal-edukazzjoni u oħrajn, skont iċ-ċirkostanzi individwali tagħhom. Is-salarji huma soġġetti għat-taxxa li tmur għall-benefiċċju tal-UE kif ukoll għal tnaqqis fir-rigward tal-kontribuzzjonijiet għall-iskemi tal-pensjoni, tal-assigurazzjoni medika, kura fit-tul u tal-assigurazzjoni kontra l-inċidenti. Il-benefiċċji la huma taxxabbli u lanqas huma pensjonabbli.

Fl-2024, is-salarji bażiċi tal-membri tal-Bord Eżekuttiv u tal-membri tal-Bord Superviżorju impjegati mill-BĊE (jiġifieri minbarra r-rappreżentanti tas-superviżuri nazzjonali) kienu dawn:^[65]

Il-benefiċċji totali li tħallsu lill-membri taż-żewġ bordijiet u l-kontribuzzjonijiet tal-BĊE għall-iskemi tal-assigurazzjoni medika, il-kura fit-tul u kontra l-inċidenti mħallsa f’isimhom ammontaw għal EUR 1,254,013 (2023: EUR 1,169,703).

Jistgħu jsiru pagamenti tranżitorji lil dawk li kienu membri taż-żewġ bordijiet għal perjodu limitat wara tmiem il-mandat tagħhom. Fl-2024 dawn il-pagamenti, il-benefiċċji relatati u l-kontribuzzjonijiet tal-BĊE għall-iskemi tal-assigurazzjoni medika, kura fit-tul u kontra l-inċidenti għal dawk li kienu membri taż-żewġ bordijiet ammontaw għal EUR 552,772 (2023: EUR 365,864). Iż-żieda kienet dovuta għal għadd akbar ta’ eks membri tal-bord li rċevew dawn il-pagamenti fl-2024 milli fl-2023.

Pagamenti relatati mal-pensjoni, inklużi benefiċċji ta’ wara l-impjieg, u kontribuzzjonijiet għall-iskema tal-assigurazzjoni medika, kura fit-tul u kontra l-inċidenti għal dawk li kienu membri tal-bord u d-dipendenti tagħhom, ammontaw għal EUR 2,185,215 (2023: EUR 2,670,313).^[66] Fl-2024, dan l-ammont kien jinkludi pagament ta’ somma f’daqqa lil eks membru tal-bord mat-tluq, filwaqt li fl-2023 kien jinkludi pagament ta’ somma f’daqqa lil eks membru tal-bord mal-irtirar. Dawn il-pagamenti saru minflok il-pagamenti futuri tal-pensjoni.

Nota 31 - Spejjeż amministrattivi

L-ispejjeż amministrattivi kienu kif ġej:

Iż-żieda fl-ispejjeż amministrattivi fl-2024 kienet prinċipalment dovuta għal (i) infiq ogħla fl-IT fir-rigward tat-trasformazzjoni diġitali (“spejjeż relatati mal-IT”); u (ii) il-kontribuzzjoni tal-BĊE għall-espansjoni tal-faċilitajiet ta’ kura ta-tfal fl-Iskola Ewropea Frankfurt (“Spejjeż relatati mal-persunal”). L-inflazzjoni kompliet taffettwa diversi spejjeż irreġistrati taħt din il-partita.

Nota 32 - Servizzi tal-produzzjoni tal-karti tal-flus

Fl-2024, din l-ispiża ammontat għal EUR 9 miljun (2023: EUR 9 miljun). It-total irriżulta predominantament mit-trasport transkonfinali ta’ karti tal-flus tal-euro bejn l-istamperiji tal-karti tal-flus u l-BĊNi, għall-kunsinna ta’ karti tal-flus ġodda, u bejn il-BĊNi, biex jagħmlu tajjeb għal nuqqasijiet ta’ provvista b’ħażniet żejda. Dawn il-kostijiet jiġġarrbu ċentralment mill-BĊE.

Nota 33 – Trasferiment (lil)/minn provvedimenti kontra r-riskji

Fl-2023, din il-partita inkludiet id-diżimpenn komplet tal-provvedimenti kontra r-riskji finanzjarji ta’ EUR 6,620 miljun biex jiġi kopert parzjalment it-telf li jirriżulta minn skoperturi għal riskji finanzjarji (ara “Provvedimenti għal riskji finanzjarji” fit-Taqsima 2.3 “Politiki kontabilistiċi”). B’riżultat ta’ dan, fil-31 ta’ Diċembru 2023, dan il-provvediment kien żero. Fl-2024, ma sar l-ebda trasferiment.

2.7 Avvenimenti post-karta tal-bilanċ

Nota 34 — Bidla fir-rata tal-imgħax użata għar-remunerazzjoni tal-bilanċi intra-Eurosistema

Fit-13 ta’ Marzu 2024, il-Kunsill Governattiv iddeċieda fuq sett ta’ prinċipji li jiggwidaw l-implimentazzjoni tal-politika monetarja fil-futur u li, fost parametri ewlenin oħra, huwa se jkompli jmexxi l-pożizzjoni tal-politika monetarja permezz tar-rata tal-faċilità ta’ depożitu.^[67] Fl-istess kuntest, il-Kunsill Governattiv iddeċieda li mill-1 ta’ Jannar 2025, ir-rata tal-faċilità ta’ depożitu ssir il-bażi għar-remunerazzjoni ta’ (i) bilanċi ta’ TARGET dovuti minn/lil BĊNi taż-żona tal-euro, (ii) pretensjonijiet relatati mal-allokazzjoni ta’ karti tal-flus tal-euro fi ħdan l-Eurosistema, u (iii) obbligazzjonijiet ekwivalenti għat-trasferiment ta’ riżervi barranin.

2.8 Rapporti finanzjarji 2020–24

Karta tal-bilanċ

Kont tal-profitt u telf